FRETILIN:"Autoridades competentes presiza investiga Sr Francisco Kalbuady Lay kona ba publikasaun allegasaun..."

.

REPUBLICA DEMOCRATICA DE TIMOR LESTE 

 PARLAMENTO NACIONAL

 BANCADA PARLAMENTAR DE FRETILIN 

Deklarasaun Politica 

Autoridades competentes presiza investiga Sr Francisco Kalbuady Lay kona ba publikasaun allegasaun suborno husi eis Presidente Asian Football Confederation ka iha lian tetum: Confederasaun Futebol Asia, Sr Mohammed Bim Hammam. 

Sr Presidenti Parlamento Nasional, 

 Ilustres Deputados, 

Povo Maubere,

 Iha loron Agostu 2012, canal Televisaun Internasional Aljazeera fo sai notisia ida ho titulu: Investigasaun intensifika kona ba Bin Hammam nia hahalok. 

 Mohammed Bin Hammam nee ema sidadaun Qatar ida neebe iha tinan hirak liu ba kotuk, sai Presidenti Confederasaun Futebol Asia nian, neebe tenki husik nia kargu tamba allegasaun mosu katak nia tenta sosa votus bainhira nia candidata a'an ba Presidenti FIFA contra Sepp Blatter. 

Televisaun Aljazeera fo sai mos katak Asian Football Confederation (AFC) liu husi nia auditoria interna ne’ebe halo iha fulan Julho akuza Presidenti Federasaun Futebol Timor Leste (FFTL) Francisco Kalbuadi Lay simu osan subornu hamutuk U$ 50.000 husi eis Presidenti Confederasaun Futebol Asia relasiona ho Mohammed Bin Hammam nia campanha eleisaun Prezidenti FIFA iha tinan kotuk.

 Auditoriu interna AFC ne’e halo husi kompania Auditoria internasional Prais Uaterhause Cupers ne’e iha loron 13 Julho 2012 identifika katak, deskunfia Mohammed Bin Hammam fo osan husi Comnfederasaun Futebol Asia nian nudar suborno hamutuk $700,000 dolar americano ba Prezidente Federasaun Nepal, Qatar, Caribia no Filipina no seluk tan, simu osan iha montante oioin. Tuir agensia notisia internasional AP, Prezidenti FFTL Kalbuadi Lay hamutuk ho official AFC balun nian simu subornu husi Mohammed Bin Hammam, eis Prezidenti AFC atu vota kontra Seep Blater ba eleisaun Prezidente FIFA. Tanba kazu ne’e nia dimensaun bo’ot, eis director FBI husi Estadus Unidus Amerika, Louis Freeh, hetan ona konvite husi AFC hodi envolve iha ekipa investigasaun ba kazu ida ne’e. 

 Resultadu auditoria hateten, Gaurav Thapa, oan husi Prezidente Federasaun Nepal simu osan hamutuk US$ 100.000, Jose Mari Martinez US$ 60.000 no US$ 11.226 hodi selu kustu saude, nune’e, Francisco Kalbuadi Lay husi Timor Leste simu US$ 50.000. 

Eis Prezidenti AFC Bin Hammam mos hetan akuzasaun hasai husi osan hamutuk US$ 700,000 husi AFC nia oferese ba ninia an no ninia familia, inklui US$ 100,000 ba nia kaben. Auditoria mos akuza portavos Federasaun Futebol Bangladesh ida simu U$ 25,000 ba interese pesoal no no ninia Sekretariu Jeral simu U$ 20,000 hodi ajuda nia tratamentu moras kankru. 

Hanesan ita hotu-hotu hatene Prezidente Federasaun Futeboll Timor Leste ne’ebe refere mak Sr Francisco Kalbuadi Lay neebe agora dadaun kaer pasta Ministru de Turizmu iha atual Governu Bloku Koligasaun. 

Akuzasaun nee seriu no ita bele dehan, affecta ona ita nia rain nudar nasaun ida neebe iha povo barak neebe hadomi jogu mundial futebol. Alegasoens barak mos mosu ona kona ba KKN envolve FFTL. 

Maibe seidauk iha investigasaun neebe seriu. Parlamento Nasional agora ke iha informasaun tenki hola posisaun seriu, tamba FFTL nee laos deit importante ba vida desportiva nasaun nian, maibe tamba simu mos bens no orsamentu husi estadu RDTL, neebe Parlamentu Nasional ida nee tenke fiskaliza. 

 Maibe nee mos direitu povo nia representante atu fiskaliza tamba FFTL organizasaun ida interesse nasional. 

Tamba nee mak Bancada FRETILIN ezigi autoridades competentes investiga kestaun allegasaun seriu suborno ida nee kona ba membru governu ida. Tamba suborno ida nee bele mos prosesa tuir Kodigu Penal RDTL nian. 

 Suborno iha desporto nee pratika ida neebe iha potensia atu estraga objectivus bot no furak desporto nian, atu hanorin prinsipius no neon diak ba ita nia gerasaun futuru. 

Sr Presidenti Parlamentu, 

 Illustres colegas Deputados, 

Povo Maubere, 

KKN nee moras ida neebe a'at tebes iha ita nia rain no a'at ba bebeik, I sei a’at liu tan karik ita husik deit hanesan lia ida la kona ba ita. Moras nee to'o ona sector sosiedade oioin. 

Agora to'o ona sector desporto, karik allegasaun ida nee lo’os. Ita hotu tenke assume no respeita inosensia ema nian to'o tribunal desidi, maibe hakarak ka lakoi, allegasaun nee deit hafoer ona naran Timor-Leste nian, no hafoer iha tinan sanolu nia laran deit depois de Timor Leste hetan Restaurasaun Independensia. 

 Ita hotu-hotu tenke husu, ida nee afecta ka lae Timor-Leste nia prospectu atu kaer Presidensia Confederasaun Futebol Asia nian iha tempo badak oin mai? 

 Se iha, entaun nee oportunidade atu hola medidas lalais no radikais kedas hodi hatudu ba mundu futebol no desportivu katak Estadu no Povo Timor-Leste iha toleransia zero ba KKN. 

Se la hola medidas entaun ita bele dehan, diskonfiansa mundu nian sei nafatin iha tempo badak, no sei sai a'at liu ba aban bainrua konaba seriedade Timor Leste nia toleransia zero ba korrupsaun. 

Sr Presidenti, 

 Illustres Colegas Deputadus, 

Povu Maubere,

 Bancada FRETILIN hakarak husu responsabilidade Chefe Governu ba consekuensias ka ba impaktu negativu mak sei mosu husi situasaun ida nee karik arrasta ba tempu kleur, sem fo’o sinal positivu ida ba mundu.

 Bancada FRETILIN ezigi deit investigasaun, maibe husu ba Chefe Governu atu hola medidas adekuadus atu hamo’os Timor-Leste nia naran. Chefe Governu tenki konsiente katak Ministru Turismu ema ida neebe tenki mos tebes atu bele fo konfiansa ba investidores sira. 

 Maski nia iha direitu katak nia sei inosente, ita hotu-hotu hatene katak mundu laos hanesan nee, no ema sei suspeita makas nia inosente ka lae. 

Situasaun ida nee sei afecta kestaun desenvolvimentu Turismu iha ita nia rain. Tamba nee mak Chefe Governu mak tenki tetu situasaun ida nee ho didiak, no hola medidas kona ba Sr Ministru de Turismu. 

 Bancada FRETILIN hein deit no sei halo akompanhamentu ba Chefe Governu hodi hare nia atu halo saida los kona ba exame ka teste ida nee neebe oras nee mosu ba nia. 

Hanesan mundu tomak, hanesan jovem barak neebe hadomi desporto ida nee, hanesan povo, ita hotu-hotu hein deit Chefe Governu kaer ba nia responsabilidade hodi hola medidas atu responde ba situasaun ida nee. 

Sr Presidenti, 

Illustres Colegas Deputadus, 

 Povu Maubere,

 Atu remata Bancada FRETILIN hakarak deit hateten katak ita hotu hein desisaun Chefe do Governu nian. 

Dili, 23 de Outubro de 2012 

Bancada Parlamentar de FRETILIN 

 Hato'o husi Deputado Eladio Faculto.

,