Vice PM La Sama; “Kuidadu, Uza Kupon Estadu!!!!”

.

Jornal Timor Post - Tersa-feira, 23 Outubru 2012 

Vice Primeiru Ministru Assuntu Sosiais Fernando La Sama de Araujo hateten, tenki prende transporte privadu hanesan kareta ho motorizada ne’ebe mak uza kupon estadu. 

 “Sei tau polisia iha konta bensin sira iha pretamina atu haree transporte privadu sira ne’ebe mak uza kupon estadu nian hodi enxe konbustivel (mina) iha Pertamina tenki kaer,” dehan Fernando La Sama iha nia diskursu iha edifisiu Sekretariu estadu Politika Formasaun Profesional no Empregu (SEPFOPE), segunda (22/10). 

Ba kestaun ne’e, nia husu ba Komisaun Anti Korupsaun (KAK) atu servisu maka’as hodi kaer ema sira ne’e atu halo investiga, atu hatene kupon ne’ebe sira uza ne’e mai husi instituisaun ne’ebe. 

Aleinde ne’e, La Sama dehan tan, funsionariu ida-idak ne’ebe mak uza kupon estadu, nia tenki uza loos ba kareta estadu ho motor estadu, la’os uza fali kupon estadu hodi enxe fali mina ba fali kareta privadu ou motor privadu, tanba buat sira ne’e mak hamosu korupsaun. 

 Ba kestaun ne’e, Prezidenti Funsaun Publiku Liborio Pereira deklara, KFP sei foti sansaun displinar ba funsionariu ne’ebe lori kareta estadu no fo aluga ba komunidade iha Distritu manatutu foin lalais ne’e. 

Liborio mos haktuir tan katak, to’o agora husi nia parte seidauk simu keixa ofisial kona-ba kazu ne’e, kuandu informasaun ne’ebe publika iha Jornal ne’e loos, maka KFP sei halo prosesu displinar. 

Nune’e, antes ne’e, iha 13 Outubru, oknum funsionariu publiku (FP) ida uza kareta estadu ho matrikula 02-819G fo aluga ba povu sira husi manatutu Vila ba Sub Distritu Soibada. 

Pasajeiru nain 5 dezloka husi kapital Dili, depois to’o iha Manatutu husu kareta atu aluga ba sub Distritu Soibada.

.