“Presu Kombustivel Hanehan Povu”

.

Jornal Timor Post - Segunda, 22 Outubru 2012 

Populasaun iha Distritu Covalima husu ba governu tenki haree kombustivel ne’ebe sa’e presu U$ 1.50 centavos kada litru, tanba fo impaktu boot ba populasaun sira. Konbustivel nia folin sa’e maka’as tebes hodi hanehan povu kiik sira, tanba ne’e husu ba governu tenki buka meus ida hodi normaliza fila fali pressu mina nian ne’ebe durante ne’e povu hasoru. 

Tuir kundutor Bis ne’ebe halai diresaun Suai-Dili ‘Kobus Manek’ ba Timor Post foin lalais hateten katak, bainhira governu la tau atensaun lalais maka povu kiik sira sei labele atu halo buat ida ba iha sira nia moris uma laran. 

 Iha fatin hanesan, hato’o mos motorizada Ozek Jeferino Amaral haktuir katak, oras ne’e dadaun mina nia folin sa’e maka’as tebes kada litru ida sa’e U$1.50. 

 Tuir ojek nain ne’e hatutan katak, presu konbustivel kada loron sempre sa’e, ida ne’e prejudika ba rendimentu ekonomia iha area rurais. 

 “Ami nia servisu durante ne’e mak ozek, sei laiha tan servisu seluk maka atu hala’o iha Covalima ne’e, tanba ne’e husu ba nain ulun sira ne’ebe responsablidade kona ba mina ne’e, tenki tau atensaun lalais,” dehan Jefri.

.