“Feto Faluk Eziji Promesa Governu”

.

Jornal Timor Post - Segunda, 22 Outubru 2012 

Feto faluk no idozus sira eziji promesas governu koligasaun ne’ebe lidera husi Primeiru Ministru Kay Rala Xanana Gusmao ne’ebe promete sei hasae sira nia pensaun. 

Ejijensia ne’e relasiona ho promesa Primeiru Ministru Kay Rala Xanana Gusmao, liu husi ninia deskursu iha uma fukun Parlamentu Nasional, wainhira hato’o programa apresiasaun kintu Governu Konstitusional ba deputadu sira. 

 “Governu konsidera dehan atu hasae ami nia osan atu asegura wainhira ita nia rejimi seguransa social estabelese ona, hodi kontributiva traballador sira hotu,” hateten Maria de Deus ba Timor Post, iha nia hela fatin Bidau, Dili (20/10). 

 Tanba ne’e, nia rasik la simu se karik la iha mudansa ba sira nia pensaun, tuir nia katak, pensaun ne’ebe sira simu kada fulan $ 30 no simu durante fulan 6 nian hamutuk $180 la sufisiente ba sira nia presiza loro-loron. 

Tanba ne’e, sira husu governu atu aumenta tan montante tuir promesa ne’ebe sira hato’o ona iha uma fukun Parlamentu Nasional foin lalais ne’e. Antes ne’e, Sekretariu estadu seguransa Sosial, Victor da Costa afirma, Ministeriu Solidaridade Sosial (MSS) sei la aumenta sira nia salariu tanba MSS implementa bazeia ba dekreitu lei ne’ebe mai husi konsellu ministru. 

 Nia dehan, idozus no invalidus iha Timor laran hamutuk kuaze 94 mil ital pesoas, sei hahu simu iha loron 13 fulan Novembru agora, simu osan ho montante hanesan uluk nian. “Iha dekretu lei hateten katak, subsidiu ba idozus $ 30 dolar signifika labele liu montante salariu minimu,” informa victor ba jornalista sira iha salaun Ministeriu negosiu Estranjeirus, Tersa foin lalais ne’e.

 Victor dehan, se estado hakarak aumenta montante subsidiu, MSS ho Ministeriu Financas tenki muda uluk dekreitu lei ne’ebe aprova husi konsellu Ministru.

.