Conocophilips Ho Woodside; “Tebe Rai Saugate”

.

Jornal Timor Post - Kuarta-feira, 24 Outubru 2012 

Kompania Conocophilips ho Woodside sei tebe rai saugate tanba kazu ne’ebe rejistu iha sesaun sivil Tribunal Distrital Dili laiha evidensia forte, tanba ne’e, estadu Timor Leste posiblidade boot manan iha Tribunal. 

 “Kompania Conocophilips no Woodside maka desidi lori estadu Timor Leste ba Tribunal, hau fiar sira sei la manan, tanba kazu 28 ne’ebe hatama iha Tribunal, laiha evidensia forte,” Sekretariu Jeral Asosiasaun Advogadu Timor Leste (AATL), Manuel Tilman ba Diariu ne’e, Tersa (23/10). 

 Tilman konsidera, kompania rua ne’e ulun to’os hodi uza sira nia poder ho dadus no rendimentu osan ne’ebe rai atu sobu plataforma mina rai iha tasi Timor, mezmu Autoridade Nasional Petroliferu (ANP) seidauk aprova). 

Tuir nia, amtes ne’e, iha ona akordu ida tau osan ruma hodi sobu plataforma iha tasi leten wainhira minarai hotu ona iha tasi okos, maibe, eis deputadu ne’e informa, akordu ne’e presiza ANP aprova uluk hafoin realiza programa refere to’o remata. 

 Realidade hatudu, Tilman esplika, ANP seidauk aprova planu desmantelamente hodi sobu plataforma ne’e, Kompania Conocophilips ho nia parseiru redus tiha ona rendimentu ne’e maka komisaun ANP foti desizaun fo likidasaun adisional. 

 Tuir nia, ho Panalty ne’ebe iha kompania Conoco Philips ho nia parseiru sira la konkorda ho likidasaun adisional ida tenki selu no fo penalty 15% ba tinan 2008, no 100% ba tinan 2009, entaun, sira desidi hatama porsesu hamutuk 28 ba tribunal, hodi husu tribunal deklara tributaria ne’e invalidu. 

Alende ne’e, Sekjer AATL ne’e mos husu ba estadu Timor Leste atu fo valor no konfiansa ba advogadu Timor-oan, ne’ebe hetan ona despaisu husi governu atu sai advodau privadu iha nasaun TL, tanba advogadu Timor oan lobuk ida mak matenek no hatene lei tributaria, entaun, governu mos presiza tulun atu fo valor no konfiansa ba advogadu sira nia servisu.

.