“MOP Sei Trava Projetu Emerjensia”

.

Jornal Timor Post - Tersa-feira, 23 Outubru 2012

Ministru Obras Publikus (MOP) Gastao Sousa hateten, Governu sei trava pagamentu ba kompania ne’ebe implementa projeitu emerjensia ne’ebe laiha kualidade no iregularidade, bainhira Komisaun Anti Korupsaun (KAK) deskobre iha prosesu investigasaun.

 “Kona-ba pagamentu ami hala’o dadaun ona atu selu iha tempu badak, maibe kompania balun ne’ebe maka hein investigasaun husi KAK, ami sei hein rezolusaun husi Ministeriu Publiku no KAK entaun ami halo pagamentu,” dehan Ministru Gastao ba Jornalista sira iha palasiu Prezidensial, Bairu-Pite, Segumda (22/10).

“Projeitu ne’ebe agora investiga hela maka iha Distritu Viqueque, maibe balun ami tenki selu iha tempu besik, tanba governu anterior nia desizaun,” nia esplika.

Nia hatutan tan katak, orsamentu atu selu kompania sira ne’ebe maka implementa ona projeitu maibe hetan iregularidade iha governu anterior sei lao tuir prosesu, bainhira prosesu investigasaun husi KAK ho Ministeriu Publiku loos ona katak laiha problema, governu bele halo pagamentu.

 Gastao mos fo sai informasaun katak, despaixo husi Xefi Governu ho Vice Primeiru Ministru kona-ba atu fo projeitu emerjensia ba emprejariu ne’ebe mak involve iha Partidu Demokratiku (PD).

“Iha Ministeriu, Projeitu emerjensia hau bele desidi atu fob a se de’it, no hau sei la fo ba emprezariu FRETILIN, CNRT ka emprezariu PD, ema hotu iha direitu atu dezenvolve rai ida ne’e,” Gastao dehan.

Tanba ne’e, nia rekuza informasaun husi nain ulun kintu governu konstitusional ne’ebe dehan projeitu ba deit koor partidu.

.