Presiza Investiga Hodi Hatudu Lia Loos; “Kilat Lakon Mosu Iha PM Nia Liman, PNTL Tenki Esplika Ba Publiku”

.

Jornal Nacional Diario - Kinta-feira, 25 Outubru 2012

Sosiedade Sivil husi fundasaun HAK, Aliansa Nasional ba Tribunal Internasional (ANTI), no Fundasaun Mahein (FM) husu ba Polisia Nasional Timor Leste (PNTL) atu esplika ba publiku motivu saida maka halo, nune’e kilat ne’ebe mak lakon iha PNTL nia liman iha fulan hirak liu ba, mosu hikas iha Primeiru Ministru (PM) Kay Rala Xanana Gusmao nia liman.

Kordinador Peskiza Fundasaun Mahein Joao Lamedia Fernandes hateten, kilat ne’ebe lakon iha fulan hirak liu ba konsege hamosu preokupasaun, tamba ne’e presiza mos esplikasaun husi PNTL kona ba oinsa prosesu investigasaun nomos oinsa bele hetan fila fali hodi hatudu lia loos ba publiku.

“Kilat ne’ebe lakon iha fulan hirak ba ne’e iha fali ona PM nia liman, ida ne’e PNTL noautoridade nebe kompetenti tenki halo esklaresementu atu nune’e ema hotu hatene konaba oinsa prosesu investigasaun no mos oinsa mak bele hetan fila fali iha PM nia liman, atu nune’e povo rai ida ne’e labele preokupa tan ho problema refere,” Joao Fernandes informa ba JNDianrio iha nia knaar fatin Balide, Kuarta (24/10).

Entertantu, antes ne’e membru Parlamentu Nasional husi Komisaun B ne’ebe trata ba asuntu defesa e seguransa, Duarte Nunes haktuir katak, kilat ne’ebe lakon agora dadaun iha ona Primeiru Ministru nia liman.

“Ami labele halo komentariu ona ba kazu kilat lakon, tanba kilat ne’e agora dadaun hetan ona no intrega tiha ona ba Primeiru Ministru,” deputadu Duarte Nunes informa.

Tuir deputadu Duarte Nunes, relatoriu kompletu kona ba kazu kilat lakon mos iha ona.

.