“Xanana Identifika Ema Balun Tenta Fa’an Timor-Leste”

.

Jornal Independente - Segunda, 22 Outubru 2012 

 Primeiru Ministru Xanana Gusmao hirus ho preokupa tebes ho Timor oan balun ne’ebe tenta fa’an rai Timor Leste ba nasaun seluk iha tinan lima kotuk. 

 “Hau nia preokupasaun mak ida ne’e, Timor oan balun hakarak fa’an ita nia rain, difikuldade boot liu hau nia iha tinan lima (ba) kotuk mak ida ne’e,” dehan PM Xanana Gusmao bainhira inagura edifisiu Universidade Dili (UNDIL) (20/10). 

 Lakohi temi naran ema ne’ebe koko fa’an rai Timor Leste, maibe PM Xanana dehan, ema sira ne’e mak uluk iha tinan 1975 lori funu mai iha Timor Leste. “Ema sira ne’e mak uluk lori ita ba funu,” dehan PM Xanana Gusmao ho lian maka’as.

 Relasiona ho preokupasaun refere, lider rezistensia ne’e, husu atu dosente UNDIL inklui universidade sira seluk, profesores iha eskola hotu tenki hanorin edukasaun sivika ba estudante sira atu sai nasionalista ba nia rain. 

 “Ne’e mak imi dosente sira la’os hanorin de’it siensia, maibe hanorin domin ba rai ida ne’e, prosesu ida ne’ebe tenki lori alunus sira sai sidadaun ida ne’ebe diak, hodi prepara joven sira nuudar fini ba futuru rai ne’e nian,” dehan nia.

 Estudante no joven sira tenke prepara an atu lidera nasaun ne’e iha futuru, se lae rai ne’e sei monu iha tempo ida bainhira lider 75 la iha ona. 

 “Ita tenki buka nafatin atu haluan ita nia matenek no hanoin atu serve diak liu, imi la prepara an didiak, ita sei mohu, imi tenki prepara an didiak atu tahan nafatin rai ida ne’e,” dehan PM Xanana Gusmao. 

.