“Ninja Mosu Iha Atabae, Ema Nain 7 Mate no Nain 5 Seluk Kanek”

.

Notisia Husi TVTL - Sesta-Kalan, 26 Outubru 2012 

Ema nain 5 inkuli bebe fulan 2 mate no nain 5 sira seluk hetan kanek todan hafoin grupu deskoinesidu ne’ebe hatais Ninja halo asaltu ba uma kain 2 iha Suku Aidaba-leten, Sub Distritu Atabae, Distritu Bobonaro. 

Polisia Distritu Bobonaro oras ne’e dadaun halo hela investigasaun hodi buka tuir suspeitu. Familia uma kain 2 iha Aldeia Tsaimea, Suku Adaba-leten, Atabae, Distritu bobonaro hetan hasaltu husi grupu deskoinesidu ne’ebe hatais ‘Ala Ninja’ hodi ta’a ema nain 5 mate iha fatin no nain lima seluk hetan kanek todan. 

 Akontesementu ne’e, akontese iha tuku 7:00 kalan no vitima sira ne’ebe hetan kanek todan oras ne’e dadaun hala’o hela tratamentu iha Hospital Nasional Guido valadares, Dili. 

Ema nain 5 ne’ebe mate iha fatin maka, Martinha Bisoko, Domingas, Laurentina, entertantu susurau tinan 8 mate iha dalan, wainhira lori mai hospital nasional Guido Valadares, Fivirianu da Cunha tinan 2 mate iha sentu saude Atabae no Carlos nuudar bebe oan ho fulan 2 mate kedas iha fatin akontesementu. 

 Tuir komandante PNTL Distritu Bobonaro Supertendenti Joao Belo dos Reis katak, kazu ne’e rasik Polisia seidauk hatene motivu loloos, tamba sei iha prosesu investigasaun hodi buka tuir suspeitu. 

Entertantu Administrador Sub Distritu Aatabae, Sidonio Fontes hateten katak, ba oin lideransa lokal sira sei kolabora ho Polisia no Joventude sira atu fo seguransa diak, nune’e labele akontese tan iha futuru iha komunidade nia leet. Familia Vitima sira husu ba Polisia Nasional Timor Leste atu kaptura suspeitu hirak ne’e hodi submete ba justica. 

 “Ema sira tama mai ne’e, oin falu metin depois oho ema arbiru de’it, ta’a labarik foin fulan 3 mos taha hotu, foin tinan ida most aha hotu, feto sira most aha hotu, se deit mak hasee sira, sira tenki taha hotu, husi parte seguransa tenki investiga tamba ami konsidera hanesan organizadu,” dehan familia vitima. 

Tuir informasaun husi familia sira katak, to’o oras ne’e, sira la hatene motivu husi akontesementu ne’e, akontesementu nee akontese horikalan tuku 7:00, ne’ebe suspeitu sira oin taka metin hodi halo asalta ba vitima sira no oras ne’e Polisia buka tuir nafatin autor kriminozu ba kazu ne’e.

.