“Aban UNMIT Intrega Knaar Ba PNTL-F-FDTL”

.

Jornal Timor Post - Tersa-feira, 30 Outubru 2012 

Hahu aban Kuarta (31/10), tuku 09:00 Otl, UNMIT ofisialmente intrega poder tomak ba Konsellu Defeza no Seguransa ba Timor Leste hodi assume responsablidade ba seguransa iha rai laran. 

Serimonia intrega knaar husi UNpol no Forsa Stabilidade Internasional ba Polisia Nasional Timor Leste (PNTL) no FALINTIL-Forsa Defeza Timor Leste (F-FDTL) ne’e hala’o husi UNMIT no Governu Timor Leste iha Palasiu Governu Dili. 

 “Ami koalia ne’e Politika estratejikas seidauk iha tempu ne’ebe diak atu temi,” dehan Xanana ba Jornalista sira, iha Palasiu Prezidenti, Bairo Pite, Dili (29/10). 

Xanana konfesa, iha loron 31 Outubru UNMIT intrega ona knar tomak ba PNTL ho F-FDTL maka kaer rasik seguransa iha rai laran, no iha loron 3 to’o loron 9 Novembru delegasaun konselu superior defeza no seguransa husi ONU sei mai iha Timor Leste. 

Tan ne’e, Xanana hateten, Prezidenti da Republika, Taur Matan Ruak husu nia atu rekruta no aumenta tan membru PNTL, relasiona ho nesesidade situasaun iha rai laran. Relasiona ho rekomendasaun Prezidenti Republika nian atu aumenta tan numeru Polisia, Xanana hatan katak, Governu iha ona planu atu aumenta tan numeru Polisia, maibe Rairobo fatin la to’o. 

“Iha oportunidade ne’e, ami nain rua la hasoru malu kleur maibe aproveita tempu koalia no haree liu tuir kbiit ita nian iha tinan ida nia laran atu halo saida, maibe seidauk ba iha termu konkreta,” dehan Xanana. 

 Iha oportunidade ne’e, Prezidenti Taur Matan Ruak husu ba Xanana atu investe maka’as ba parte edukasaun formal iha eskola, saude, no edukasaun moral atu nune’e, ba futuru nasaun Timor bele diak liu tan. 

 “Ami diskuti oituan situasaun em jeral, depois Prezidenti informa hau hanoin orsamentu jeral 2013 nian depois, ne’ebe ami temi, liu-liu hanesan Politikas la’os kazus konkretu kona ba sentralizasaun ne’e, oin nusa mak bele hala’o tinan oin mai ne’e,” Primeiru Ministru Xanana Gusmao haktuir. Presidenti mos husu para iha 2013, reforsa hodi hadia kapasitasaun iha Ministeriu hotu.

.