Kazu ConocoPhilips; “PM Xanana Presiza Involve Advogado Timor Oan”

.

Jornal Nacional Diario - Sesta-feira, 19 Outubru 2012 

Sekretariu Jeral Asosiasaun Advogadu Timor Leste (AATL) Manuel Tilman dehan, atu defende interese nasional kontekstu kazu Conocophilips ho Governu Timor Leste, Premeiru Ministru Kay Rala Xanana Gusmao, presiza involve mos advogadu Timor oan, maske governu rasik halo ona kontratu ho advogadu Internasional. 

“Kuandu tau fali advogadu internasional sira iha oin, ita nia advogadu nasional sira ita halo sira zero tiha, hau tinan 10 iha Timor Leste, hau mak derizi komisaun ekonomia financas hodi aprova lei tratadu sira kona-ba mina rai nian, la iha tan ema ida iha Timor ke hateten tratadu tasi Timor nian, hanesan hau,…., internasional sira ne’ebe mak ita selu agora, ho U$ 1.050.000 ne’e atu halo saida, foin lalais ne’e sira (advogadu internasional-red) hatama sala tiha rekerementu ida iha Tribunal, e kona tiha multa,” dehan Manuel Tilman ba JNDiario bainhira hasoru malu iha edifisiu JNDiario, Bebora, Kinta (18/10).

 Antes ne’e parlamentu Nasional mos aprova ona iha orsamentu retifikativu ho montante 1.050.000 Dollar Amerikanu atu kontrata advogado Internasional hodi bele defende Governu iha Tribunal. 

 Tuir ex-deputadu ne’e dehan, difikuludade ne’ebe mak advogado Internasional hasoru bainhira iha prosesu kazu mak lingua, advogadu internasional la hatene lingua ofisial Timor Leste nian, otomatikamente tenki presiza tan tradutor, nune’e bele kria konfuzaun bainhira estuda prosesu kazu.

 Tanba la koinese diak lei Timor Leste nian, iha prosesu hatama rekerementu, Advogado Internasional halo tiha failansu, iha praju hamata rekerementu nian, nune’e obruga governu tenki selu tan multa ba Tribunal maske multa ne’e ho osan ki’ik koan U$ 50.00. 

“Ida ne’e hamoe ita nuudar Timor oan,” Manuel Tilman espresa. 

Kompania ne’ebe hamutuk Conocophilips hatama Governu Timor Leste ba Tribunal mak hanesan kompanha Tokyo Times, Timor Sea Resources PTY Limited, NGPDA Limited, ConocoPhilips PTY Limited, Projafe Rice Limited, Linca Limited, no kompanhia 26 tan. Rajaun kompania internasional 28 ne’e hatama prosesu ba tribunal hasoru Timor Leste, atu husu klarifikasaun, desizaun ida ne’ebe husi komisariu reseita mina Timor nian, atu deklara impostu adisional ne’e la validu. 

Desizaun ne’ebe Timor Leste nian, ne’ebe mak kompania tenki kumpri mak kompania tenki selu tomak tasa ne’ebe, aplika ba rendimentu 2008 ho 2009 nian. Ba kestaun ne’e, kompania lakohi simu desizaun husi komisariu reseitas mina Timor Leste nian, no sira hamenus nafatin osan iha 2008 no 2009, entaun Timor Leste foti desizaun fo penalizasaun ba sira katak, labele redus rendimentu ida ba dezvantelamentu dezavetasaun plataforma tasi laran nian, selu multa 15% kona ba redimentu taxas 2008 nian. 

 Eis Deputadu ne’e mos hateten katak, Ministeriu Publiku Timor Leste nia lori estadu TL nia naran, fo kontestasaun ba kompanha sira dehan katak, kompanha la iha razaun, tanba komisariu Timor Leste nia desizaun ne’e legal, tanba ne’e mak Tribunal tenki kondena kompanha sira selu nafatinkona ba taxa rendimentu 2008 no 2009 nian, ho tan penalties 15 % ba rendimentu 2008 nian, i 100% ba 2009 nian. 

 Iha asuntu seluk iha intervensaun Ministeriu Publiku, ne’ebe hanaran auto tributariu liquidasaun adisional katak, ba 2008 no 2009 nian ne’e, paralende taxas ne’ebe kompanhia sira iha obrigasaun atu selu adisional ida ho tan 15% penalties. Nune’e, Manuel Tilman sujere, estadu bele nomea advogado privadu, maibe Ministeriu Publiku iha papel nafatin atu hare ba fiskalizasaun, ba kompriementu lei nian, defeza ba interese estadu nian, i reprezenta interese publiku povu Timor nian.

.