“Komunidade Senti Seidauk Ukun-An”

.

Jornal Timor Post - Sabadu, 20 Outubru 2012 

Komunidade husi Aldeia haat hanesan Lugatu, Hatumerah, Tiliga no Sebagula husi Suku Ainaro, Distritu Ainaro, senti seidauk ukun-an tanba nasaun ida ne’e ukun an tinan 11 resin ona, maibe povu iha area refere sei moris iha susar no mukit nia laran. 

 Xefi Aldeia Hatumerah Luis Sequeira hateten, ukun an tinan 11 resin ona, maibe dezenvolvimentu nunka tama iha sira nia fatin, hahu kedas IV Governu konstitusional to’o agora, tinan-tinan Parlamentu Nasional sempre aprova orsamentu ne’ebe boot tebes maibe dezenvolvimentu iha Aldeia la la’o ba oin, inklui Aldeia haat refere. 

“Hau nia komunidade durante ne’e nunka hetan projeitu ruma, maibe tinan-tinan sira rona orsamentu jeral boot tebes, maibe osan hirak ne’e mohut de’it iha Dili no fatin seluk, tanba ne’e mak sira senti seidauk ukun an, maske nasaun RDTL ukun an tinan 11 resin ona,” Luis dehan ba Timor Post iha nia kna’ar fatin foin lalais ne’e. Aleinde ne’e, Adolfo de Araujo hanesan komunidade husi Aldeia Tiliga husu ba Governu Koligasaun atu kria kampu de Trabalhu hanesan harii industria ruma, loke estrada ou kria kampo servisu sira seluk, nune’e povu mukit sir abele servisu no hetan netik osan dolar ida hodi hatende nesesidade loro-loron nian, tanba durante ne’e dezenvolvimentu nunka tama iha sira nia bairo. 

 Nune’e mos, Frederico da Cruz hanesan komunidade komunidade Aldeia sabagulau hateten, governu promete ba povu katak funu hotu no ukun-an tinan 11 povu tenki moris diak, maibe ukun an tinan 11 ona, povu moris at nafatin, tanba iha IV Governu konstitusional no kintu Governu mosu KKN barak liu, ida ne’e mak halo povu terus ba bebeik.

.