“Udan Tun Semana Rua, Estrada Hanesan Mota”

.

Jornal Timor Post - Sabadu, 20 Outubru 2012 

Impaktu husi udan ne’ebe maka tun durante semana rua nia laran, afeira liu-ba estrada ne’ebe mak liga ba Ainaro-Dili iha parte manutasi ninian, ne’ebe sai hanesan mota tanba estrada hirak ne’e kuaze kuak hotu hodi difikulta transporte publiku no privadu sira. 

Iha area Manutasi, Ainaro, estrada ne’e sai hanesan mota no bele fo ameasa ba transporte ne’ebe maka halo viazen Ainaro-Dili, ho kondisaun ne’e, paskeiru barak maka laran tristi bainhira tama iha area manutasi RK4 tanba kareta halis ba mai. 

Kondutor Bus Tanet Apolinario de Jesus informa, estrada iha area Manutasi ne’e difikulta sira tanba kuandu to’o tempu udan kareta namadoras tanba estrada at no bainhira to’o iha fatin refere pasajeiru sira tenki tun tanba tauk kareta baku fila. 

Nune’e mos, Domingos Cabral hanesan pasajeirus la kontenti atu halo viazen Ainaro-Dili tanba kondisaun estrada at no impede netik transporte, pasajeiru sira senti hakfodak tanba kareta sa’e tiha to’o klaran lori kotuk tun fali noa halis ba mai. 

 “Iha estrada oan ne’e ami sempre tun, tanba rai namdoras kareta hakiduk fali mai kotuk no dala barak ona motorista no transporte publiku balun sempre baku fila iha fatin refere, tanba estrada ne’e sai fali rai no tahu, wainhira udan kareta sa’e la bele,” Domingos dehan ba Timor Post iha Ainaro Vila, foin lalais ne’e. 

Entertantu, Administrador Distritu Ainaro Manuel Pereira informa katak, kona-ba esrada hirak ne’e nia hato’o ona ba iha nasional maibe sei iha prosesu nia laran.

.