“Kompleta Loron 60 Servisu Governu, FRETILIN Kestiaona, Bloku Koligasaun Defende”

.

Jornal Nacional Diario - Tersa-feira, 09 Outubru 2012

Servisu Kintu (V) Governu konstitusional nian la senti katak, ohin tersa (08/10) halo kompletu ona ba loron 60, iha loron 60 ne’e halo deputadu bankada FRETILIN iha Parlamentu Nasional kestiaona servisu kada membru governu ne’ebe ladun efektivu, maibe Bankada Bloku Koligasaun (BK) defende maka’as servisu membru Governu nian. 

Tuir deputadu opozisaun FRETILIN, Inacio Moreira hateten katak, nia duvida ho kapasidade membru governu nian, tanba iha loron 60 ona seidauk halo programa ida ne’ebe maka benefisia ba povu iha kualker aspeitu.

 “Ne’e mak ita kumplikadu oituan, sira hakarak hatete lolos katak, los duni informasaun ne’ebe iha governu ida ne’e, iha nia servisu iha loron atus ida, tenki fo impaktu pozitivu ba iha atividades ne’e hotu, lolos sira nia servisu iha loron 100 tenik deklara ba povu para povu bele hatene, sira nia servisu durante ne’e diak ka lae?” dehan Inacio Moreira ba Jornalista sira (08/10). 

Inacio Moreira mos la menta ho Ministeriu no Sekretariu Estadu ne’ebe mak to’o agora sei impresta tutan edifisiu Ministeriu seluk nian para hala’o servisu. Entertantu, Deputadu husi Bloku Koligasaun atual Segundu Vice Prezidenti parlamentu Nasional, Aderito Hugo da Costa, konsidera, kompleta loron 60 servisu membru governu nian hatudu duni sira nia servisu diak, maske membru governu barak sei konsentra liu iha konsolidasaun internal iha relasaun ho lei organiku nian. 

 Aderito hatutan, maske povu tomak seidauk hare sira nia katividade ne’e lao ho efektivu, maibe relasaun ho preparasaun aktividade Administrasaun sira hala’o, realidade hatudu iha proposta orsamentu Retifikativu ne’ebe membru Governu sira aprova iha Konsellu Ministru hodi haruka ba PN. 

Nia mos hateten, aktividade ba membru governu iha loron 60 nee tenki halo, tanba obrigasaun konstitusional molok atu aprezenta orsamentu, tenki aprezenta ida-idak nia programa, tuir lei organiku V Governu nian. V Governu Konstitusional forma husi Bloku Koligasaun ne’ebe kompostu husi Partidu Congresu Nasional Rekonstrusaun Timor (CNRT), partidu Demokratiku (PD) no Frenti-Mudanca, iha loron 8 Outubru horseik, V Governu Konstitusional kompleta ona loron 60.

.