“Ativista Husi Nasaun 26 Sei Partisipa Selebrasaun Masakre St. Cruz”

.

Jornal Independente - Tersa-feira, 09 Outubru 2012

Primeiru Ministru Xanana Gusmao hatuun ona despaixu ba Ministeriu ESTATAL ho Sekretariu Estadu Joventude Desportu hodi suprota serimonia ba loron 12 Novembru Masakre St Cruz. 

Ministru STATAL Jorge Teme hateten, STATAL sei suporta atividade ne’e hanesan konferensia internasional no expozisaun ba selebra loron 12 Novembru tinan ne’e. 

 “Ida ne’e ami hetan despaixu husi Primeiru Ministru, tanba osan alokadu husi Ministeriu ida ne’e, ami sei apoia aserka U$100 mil,” dehan Jorge Teme. 

Entertantu, Sekretariu Estadu Joventude Desportu (SEJD) Miguel Manetelu dehan, SEJD sei apoiu orsamentu ba serimonia ne’e tamba loron 12 Novembru hanesan ba loron joventude TL, tamba ne’e husi nia Ministeriu sei aloka osan U$ 40 mill.

 Entertantu komisaun organizadora selebrasaun 12 Novembru, Jacinto Alves hatete komemorasaun iha tinan ida ne’e sei fo sai imazen kona ba, buat hotu-hotu ne’ebe akontese iha momentu manifestasaun 12 Novembru 1991, ne’ebe rejulta masakre santa Cruz. 

 Iha selebrasaun ne’e, sei konvida mos ativista husi nasaun 23, ne’ebe iha momentu ne’eba mai ho ro Lusitiania Expreso ho objetivu atu fo apoiu ba TL. Konvida moa komandante Marina ba Ro Militar Indoensia Io Sudarso ne’ebe iha momentu ne’eba, trava ativista hirak mai Timor Leste. 

 Jacinto dehan, sei konvida mos jornalista sira ne’ebe uluk halo kobertura ba iha katividade 12 Novembru nian. Iha serimonia ida ne’e, Jacinto mos dehan, sei loke konferensia internasional hodi halo reflesaun ba akontesementu hodi asai akta ida kona ba konferensia ne’e.

 Atu realiza serimonia ne’e, Jacinto dehan, komisaun organizadora aprezenta proposta orsamentu ne’ebe maka sei gasta ba aktividade ne’e, hamutuk US$ 300 mil.

.