Governu Sei Fó Tempu ba Komunidade Okupa Akait

.

CJITL- Sesta-Feira, 5 husi Outubru 2012 

DILI: Sekretariu Estadu Terras no Propriedades (SETP), Jaime Xavier hateten governu sei fó tan tempu ba komunidade sira ne’ebé to’o agora sei okupa hela uma no rai estadu iha parte Akait. 

“Kona-ba komunidade sira iha fatin refere, antes ne’e ami haruka ona karta ida atu husik mamuk fatin komesa dia 5 Outubru ne’e. Maibé, ami sei fó tan tempu ba sira. Tanba, ami sei prepara fatin atu nune’e sira sai karik, sira bele ba hela iha ne’eba,” dehan Jaime ba CJITL iha ninia kna’ar fatin, Kinta (04/10). 

 Governu, tuir Jaime, tenki prepara fatin balun tanba ema ne’ebé hela iha area refere mesak estudantes hotu. 

Tanba ne’e, parte husi komunidades sira hatama ona naran ba iha parte DNTP hodi identifika. “Ate agora, parte ne’e seidauk identifika. 

Mais, sira fó lista ne’e mai husi estudante UNTL, Eiros, UNDIL, UNPAZ, ISC, IOB no DIT. Sira ne’ebé tau naran hamutuk 308 pesoas. 

Iha mós joventude i kaben nain hamutuk nain 8. Ne’ebé sira fó ho sira nian kartaun eleitoral. Iha balu seidauk tau naran,” hatutan Jaime. CJITL/Benjamin

.