Komunidade Komoro Husu Governu Atu Proteze Nain ba Rai: “Familia Carrascalao Uza Rai Ne’e Ba Hakiak Animal La’os Nain Ba Rai”

.

Notisia Husi TVTL - Tersa-Kalan, 09 Outubru 2012 

Komunidade ne’ebe hela iha parte Comoro husu ba Governu atu proteze sira husi hahalok ema balun ne’ebe hakarak hasai sira husi sira nia hela fatin. 

Tuir komunidade sira katak, oras ne’e rai ne’ebe iha dokumentus reklama ona sira nia rai, maske komunidade balun hela tinan 30 resin ona. Liu husi konferensia da imprensa Terca feira ne’e iha sede Suku Komoro, komunidade sira ne’ebe hela iha parte Komoro nian, lamenta ho atetude ema balun ne’ebe levanta problema rai parte Komoro nian hodi hasai komunidade sira husi fatin refere. 

Reprejetante komunidade Komoro, liu husi konferensia da imprensa husu ba familia ne’ebe mai reklama rai ne’e, tenki hatudu dokumentu rai nia lolos hodi labele duni sai povu sira husi fatin ne’e, tamba komunidade sira iha direitu atu hetan rai pedasku ida. 

 “Inkontru ida ne’e atu hatene loloos kona ba nain ba rai Komoro, nune’e komunidade hamutuk hodi hasoru se deit mak hakarak halakon dereitu ba rai, tamba rai ne’e familia Carrascalao iha deit dokumentu husi tempu kolonializmu katak, sira iha direitu atu hakiak animal laos nain ba rai,” dehan komunidade. N

Nune’e mos komunidade sira ne’e hela kleur ona durante tinan 30 resin iha rai ida ne’e, husu atu esplika loloos kona ba direitu ba rai ne’e, tamba tuir sira nia hatene katak rai ne’e familia Carascalao uza hodi hakiak animal, maibe la’os atu nain ba rai.

.