Aniceto Guterres Konsidera; “Claudio Ximenes Viola Nia Dever, Independencia no Imparsialidade”

.

Jornal Nacional Diario - Sesta-Feira, 19 Abril 2013 

Deputadu Aniceto Guterres horseik manda karta komunikadu ba media komunikasaun social sira hodi esklarese katak, Presidenti Tribunal Rekursu Claudio Ximenes halo beibeik kontaktu telefonika ho kondenada Lucia Lobato molok no hafoin desizaun Tribunal de Rekursu iha loron 18 Janeiru 2012 hodi mantein desizaun tribunal primeira instansia ho pena prizaun tinan lima (5) fulan nen (6). 

Aniceto esplika iha komunikadu ne’e katak, Claudio hateten katak kontaktu hirak ne’e nu’udar “kolega” maibe la hatete asuntu saida maka sira koalia, maibe, faktus oi-oin mosu hafoin konversa entre presidente TR ne’e ho Prizioneira Lucia Lobato. 

Hanesan kondenada Lucia Lobato hatama nia rekerimentu habeas corpus ba Tribunal de Rekursu, hafoin Tribunal hasai desizaun ba rekerementu ne’e ho akordaun 30 de janeiru 2013 husi koletivu juis nain tolu ne’ebe Sr, Claudio Ximenes maka presidi no relator Juis Jose Luis Gaio, i iha akordaun ne’ebe refere, Juiz Caludio Ximenes vota kontra noa halo nia votu vensidu ne’ebe simu fundamentu ne’ebe hato’o husi rekerente Sra. Lucia Lobato, no juis Claudio nia fundamentu iha votu vensidu ne’e la konsistente ka kontraria totalmente ho dutrina ne’ebe nia rasik hanorin no kontempla iha akordaun sira uluk (iha kazu ne’ebe hanesan maibe rekerente ema seluk), liu-liu akordaun ho data 12-10-2009, processo no.01/HC/2009/TR, relator Claudio Ximenes no, akordaun ho data 31-3-2011, processo no. 71/CO/2009/TR, relator Jose Luis Goia, ne’e mak dadaun ne’e tama tiha ona rekursu extraordinariufoun ida tan, no Prizioneira Lucia Lobato sira mos iha kontaktu permanente ho Juis margarida Veloso ne’ebe sai hanesan advogado informal ba Lucia Lobato. 

Aniceto esplika hikas iha komunikadu ne’e katak, hare husi kontaktu telefonika no faktus refere, hatudu momos katak, iha kombinasaun entre Claudio Ximenes husi parte ida ho prizioneira Lucia Lobato ho Juisa Margarida husi parte seluk, kona ba prosesu no kontiudu rekursu sira ne’ebe Lucia Lobato ho nia advogado sira hato’o ba Tribunal. 

 Aniceto konsidera, Claudio Ximenes viola nia dever de independencia, isencao e imparsialidade, no halo diskriminasaun iha aplikasaun lei ba ema ne’ebe iha osan, ka iha poder, no ba ema sira ne’ebe laiha kbiit. Tuir Deputadu Aniceto katak, ida ne’e grave tebes ba juis Prezidenti Tribunal a’as liu iha Timor Leste, tanba afeta ba sistema justisa tomak, juis sai fali hanesan advogado ka defensor, “di belakang layar” ba interese arguido ka kodenado sira iha prosesu Tribunal. 

.