Povu Sei Moris Mukit “FRETILIN Konsidera Grupo Elite Mak Goza”

.

Jornal Nacional Diario - Sesta-Feira, 19 Abril 2013 

Reprezetante povu husi bancada FRETILIN, iha Parlamentu Nasional (PN), Inacio Moreira, konsidera iha era independensia ne’e povu kbiit laek sira sempre moris iha mukit nia laran, tanba rikusoin Timor Leste nian ne’e ba deit grupu elite sira mak goza. 

 “Atu koalia lolos ne’e ita nia osan ne’e iha, maibe monu iha grupu oan ida nia liamn deit, grupo oan ida mak goza osan estadu nian ne’ebe alokadu ba halo dezenvolvimentu, pior liu tan tanba ita iha ne’e depende liu ba importasaun,” sublina Inacio Moreira ba JNDiario iha PN Kinta (18/4), bainhira konfirma populasaun Distritu Manufahi 84% sei moris iha mukit. 

Deputadu Iancio Moreira, la fiar informasaun ne’ebe fo sai husi Governu katak, kreximentu ekonomi Timor Leste sa’e maka’as tebes ikus-ikus ne’e, tanba nia konsidera, ne’e hanesan slogan ida. 

“Lolos ne’e kresimentu ekonomia sa’e ne’e, ba projesaun ho previzaun orsamentu ne’ebe sira aloka, maibe hau hakarak konfesa katak, kresimentu ekonomia ne’e la muda ba mai no nein sa’e oituan, no ita nia povu iha fatin barak maka buka osan haraska,” tenik nia. 

Ho fenomena ne’e, Inacio sujere ba Governu atu matan moris neon nain iha deizaun politika hodi sustenta povu nia kondisaun ekonomia ne’ebe fraku tebe-tebes. “Kuandu hakarak buat hotu lao los ne’e, tenki hatudu honestidade politika hodi informa buat los, tanba povo kuandu laiha hahan ne’e governu tenki responsabliza,” hatutan Inacio Moreira. 

 Lolos ne’e, Inacio Moreira dehan, responsablidade GOvernu nian liu husi Ministeriu negosiu estranjeiru tenki halo lobby maka’as atu investor estranjeiru bele nai investe ona, hanesan loke fabrika ruma iha nasaun ne’e, par abele akomoda Timor oan sira ba serviso. 

Alende ne’e, Deputadu Paulino Monteiro husi Bancada PD fo hanoin katak, atu halo sasukat ba problema kiak ne’e labele siik deit, maibe tenki liu husi dadus ne’ebe konkretu. 

“Haul abele dehan katak, povu 84% iha Distritu Manufahi moris iha mukit, tanba ita seidauk halo sasukat ida, tenki liu husi fiskalizasaun ida atu ita fiskaliza los katak, pursentu hira mak tama iha kiak, hau la dun konkorda ho ida ne’e,” tenik Paulino Monteiro. 

Antes ne’e Primeiru Ministru Kay Rala Xanana Gusmao informa katak, povu iha Distritu Manufahi kuaje 84% moris iha mukit nia laran, maibe PM Xanana la esplika indikador husi mukit ne’e haree husi parte ne’ebe. 

,