“Kor Diferente Husi Jornal INDEPENDENTE”

.

Foto, Jornal Independente

Jornal Independente - Kinta-Feira, 04 Abril 2013 

Tinan rua ona Jornal INDEPENDENTE eziste hodi servisu publiku, Jornal ne’e koko atu fo kor ne’ebe diferente iha ninia publikasaun, oferese nia aan hodi hakumula ema hotu nia lian no koko atu sai fonte informasaun ne’ebe loos no kredibel, maski nune’e, konserteza sei iha frakeiza lubuk ida ne’ebe presiza hadia. 

Relasiona ho aniversariu jornal INDEPENDENTE bad ala rua ne’ebe monu iha loron 4 Abril tinan ne’e, Diretor Organizasaun Naun-Govermental (ONG) Luta Hamutuk, Mericio Akara hateten, Jornal INDEPENDENTE ho ninia karakter professional no independente, kritiku, no halo balansu opiniaun entre fonte ida ho fonte seluk. 

 Karakter ida ne’e, tuir nia, bele fanun publiku, tantu Governu no sosiedade hodi halo reflesaun ba ida-idak nia aan. “Jornal INDEPENDENTE konsege foti povu kiik nia lian ne’ebe make ma nunka preokupa, tanba ne’e ami sosiedade sivili louva ejistensia Jornal INDEPENDENTE ne’ebe halo tinan rua ona iha Timor Leste,” dehan Akara iha nia kna’ar fatin, Farol, (3/4). 

 Akara mos fo parabens ba Jornal INDEPENDENTE ne’ebe halo tinan rua ona no konsege ultrapasa dezafiu lubuk ida. Akara Sujere ba Jornal INDEPENDENTE atu publika koloridu, nune’e bele hetan valor diak liu tan hodi kompete ho jornal sira seluk. Iha fatin ketak, Diretor Ezekutivu JSMP, Luis Sampaio fo parabens no desezu ba susesu Jornal INDEPENDENTE. Nia rekonese produtividade, kredibilidade, no independensia Jornal INDEPENDENTE hodi servi publiku iha ninia publikasaun loroloron. 

 “Empreza ida kuandu hamrik ona tinan ona, entaun ita iha esperansa atu hakat ba oin no iha ona esperitu atu hetan moris diak,” dehan nia. Nia dehan maske sei mosu failansu balun iha publikasaun Jornal ne’e, maibe nia dehan ida ne’e sai hanesan etapa aprendis hodi bele sai diak liu tan iha tempu oin mai. 

 “Timor Leste foin tama iha rekonstrusaun estadu, entaun failansu no dezafiu hanesan problema nasional, laos media mesak mak hasoru, maibe ita hotu hasoru, tanba ita hotu foin tama iha prosesu aprendizazen,” katak nia. 

Luis husu ba Jornal ne’e atu servisu maka’as liu tan no pronto simu kritika husi publiku, simu dezafiu, atu nune’e bele hetan mos esperensia hodi hadia a’an. Iha parte seluk deputadau husi Bancada CNRT, Cesar Valente hateten, Jornal INDEPENDENTE produs notisia ho kualidade diak, tanba bele halo kobertura informasaun ne’ebe jornal seluk nunka kobra. 

“Informasaun husi ema kiak nian publika iha Jornal ita gosta lee, tanba ita hotu nunka hatene atu levanta asuntu ne’e, entaun ho Jornal INDEPENDENTE ni aezistensia, bele fanun ona publiku atu hatene, katak nia. Entertantu, komunidade Kaikoli, Mario Remegio fo parabens ba Jornal ne’e no husu atu kontinua halo kobertura ba informasaun hodi publiku bele hatene situasaun rai laran no rai liur nian. 

Iha sorin seluk, Estudante Universidade Nasional Timor Lorosa’e (UNTL) Quiteria Soares espera katak, ho aniversariu ba da ruak ne’e Jornal INDEPENDENTEbele sai diak liu tan iha futuru. 

Nia mos husu ba media no Jornalista sira atu labele tauk fo sai lia loos no labele tauk mos ba ameasa husi ema seluk. 

Nune’e, Estudante Universidade Dili (UNDIL) Estanislao Ramos louva kontribuisaun ne’ebe Jornal INDEPENDENTE fo durante ne’e. Nia husu ba Jornal ne’e atu bele servisu maka’as liu tan iha area informasaun hodi bele kontribui ba dezenvolvimentu nasional. 

Nota do blogue: PARABÉNS, JORNAL INDEPENDENTE!

.