Lere Konsidera Arte Marsiais Hahu Manas; “F-FDTL Sei Ba Area Izoladu”

.

Jornal Nacional Diario - Kinta-Feira, 25 Abril 2013 

Xefi estadu das FALINTIL-Forsa Defesa Timor Leste (F-FDTL) Maijor Jeneral, Lere Anan Timur haree katak, ikus-ikus ne’e grupu arte-marsiais sira hahu manas ho sira nia atetude ne’ebe la kontribui ba establidade iha rai laran. Maske nune’e, Lere informa katak, situasaun jeral iha Timor Leste la’o ho konduzivu. 

“Situasaun iha rai laran diak hela, maibe Arte Marsiais maka agora komesa manas oituan, mas enkuantu tamba ita seidauk alerta sira ne’e maka sira manas oituan, mas laiha problema,” dehan Maijen Lere ba Jornalista sira iha palasiu Prezidensial, Aitarak laran, Dili hafoin hala’o enkontru semanal ho Prezidenti da Republika (PR) Taur Matan Ruak, Kuarta (24/4) hodi informa situasuan actual rai laran. 

Maijen Lere maske la temi detallu konaba grupu artemarsiais ida ne’ebe, maibe Lere fundamenta katak, sei iha medidas ba grupo ka autores sira ne’ebe gosta halo instabiliza situasuan iha rai laran. 

Lere Anan afirma katak, medidas ne’e la’os ba membrus artemarsiais sira ne’ebe maka halo problema, maibe sei foti medidas hasoru ulun sira husi grupu artemarsiais ne’ebe gosta halo problema. Alen de ne’e Xefi Estadu das F-FDTL, Maijen Lere Anan Timur mos dehan katak, komandu F-FDTL iha ona planu atu tau atensaun ba area sira ne’ebe maka sei ijoladu liu, hodi bele fo seguransa ba komunidade no prevene aktividades kobransa illegal sira. 

 Kestaun ne’e Maijen Lere hato’o relasiona ho grupo deskoinesidu neebe maka hala’o kobransa illegal iha Distritu Ermera foin lalais ne’e no obriga populasaun kiik sira iha Distritu refere halo karataun ne’ebe ho folin U$1 to’o 24. 

Tamba ne’e, Maijen Lere dehan, grupo deskoinesidu ne’ebe agora iha, presiza serviso maka’as, tanba grupo deskuinesidu sira ne’e mosu iha fatin ne’ebe maka izoladu ka dook husi vila kapital Distritu nian.

“Entaun, hau nia planu, hau sei insita hau nia atensaun ba zona izoladu, hanesan exersizio no patrolha ruma. 

Nia hatutan, sei bele halo seguransa ba populasaun, tamba iha konstituisaun difini nia misaun kataksempre iha kopperasaun aktividades ne’ebe toma konta ba seguransa hanesan Instrituisaun PNTL hodi hapara aktividades illegal iha rai laran.

.