Mateus de Jesus: “Defende Imajen, Diak Liu Hasai Imunidade Borulaco”

.

Jornal Nacional Diario - Kinta-Feira, 25 Abril 2013

Prezidenti Komisaun G Parlamentu Nasional (PN) ne’ebe trata asuntu Etika da Deputadus, Mateus de Jesus hateten katak, atu labele husik hela imajen no mensajen la diak ba publiku, PN nu’udar orgaun Lejislador, ne’ebe tau aas interese nasional no lei, diak liu hasai imunidade eis Diretor Jeral Ministeriu Finansas, actual Sekretariu Estadu Fortelesementu Institusional (SEFI) Francisco Borulaco atu ba hatan iha Tribunal.

“Ida-idak nia politika hau seidauk haree no ema seluk nian hanoin, maibe bah au pessoalmente, diak liu ita hasai imunidade ne’e para ital abele fo imajen ida ne’ebe la dun diak,” hateten Mateus de Jesus,

Nu’udar Prezidenti Komisaun G ne’ebe trata ba asuntu Etika dos Deputadu sira iha Parlamentu Nasional (PN) ba JNdiario iha PN Kuarta (24/4), wainhira husu nia komentariu konaba Francisco Borulaco ne’ebe mak to’o oras ne’e dadaun PN seidauk hasai nia imunidade.

Francisco Borulaco hetan ona nutifikasaun husi Tribunal, ho alegasaun involve iha kazu abuzu de poder ho fraudiu fiskal, iha Governasaun Aliansa Maioria Parlamentar (AMP). Mateus de Jesus hatutan, desizaun atu hasai imunidade ou la’e, depende ba desizaun plenaria Parlamentu ne’ebe sei hala’o iha 6-7 Maiu 2013.

Nia mos hatutan tan katak, karik aproba no hasai imunidade, nia tenki ba duni Tribunal hodi fo ninia justifikasaun ba kazu ne’ebe maka oras ne’e Tribunal fo ba nia. Tanba tuir Mateus de Jesus, komisaun G iha Tersa (23/4) aprova ona pareser no sei enkaminha ba iha meja Parlamentu, iha kinta (25/4) nune’e meja bele haree no tau ba ajenda hodi deskute no aprova, katak bele foti ninia imunidade ka la’e, tuir kbi’it Parlamentu nian.

Deputadu bancada CNRT ne’e hatutan tan katak, Komisaun G nia kompetensia maka halo pareser no simu opiniaun.

“Ami nia komisaun iha kbi’it de’it atu halo pareser simu opiniaun, depois ami produz no entrega ba meja Parlamentu Nasional, maibe plenaria mak soberanu no plenaria mak sei desidi katak, ninia imunidade atu hasai ka la hasai hodi nia ba hataan iha Tribunal, ne’e desizaun iha deputadu nain 65 iha PN nia liman,” Mateus de Jesus koalia.

Atu dehan katak, tenik Mateus de Jesus, Borlaco sala ou loos, so Tribunal de’it maka bele hola desizaun.

.