‘Kaju Lucia Lobato’ “Advogadu Hato’o Keixa Ba MP”

.

Jornal Nacional Diario - Kinta-Feira, 18 Abril 2013 

Ekipa Advodadu Prizioneira Lucia Lobato Segunda (15/4), hatama ona keixa ba Ministeriu Publiku (MP) hasoru juis internasional rua, nasional ida no membru Parlamentu nasional husi bancada FRETILIN. 

 Lowyers Lucia Lobato nian ne’e hato’o keixa ba MP, tanba konsidera desizaun rekursu habeas corpus Lucia Lobato nia la tuir lei no injustisa. “Ami nudar Advogadu hatama ona ba MP, maibe seidauk rejistu mas so iha deit tanda terima no numeru prosesu bainhira rejistu ona mak ami sei fo sai ba publiku,” informa Lowyers Lucia Lobato nian, Jose Pedro Camoes ba Jornalista iha Dili, Kuarta (17/4). 

Advogado Jose Pedro Camoes mos konsidera desizaun ne’ebe Tribunal Rekursu hasai hodi mantein kadeia tinan lima ba eis Ministra Justisa Lucia LObato tuir deit akordu Juiz nian ne’ebe kontra lei.

 Ekipa Lowyers Lucia LObato nia mos aprezenta karta eletrinika (e-mail) ne’ebe juis Internasional ho inisial RP haruka iha loron 31 Janeiru 2013 hodi hateten, Juis MG halo ameasa ba juis internasional LG katak, se karik Juiz LG fo apoiu ba rekursu habeas corpus ne’ebe eis Ministra Justisa hatama maka Juiz MG la renova Juiz LG nia kontratu. 

 Iha e-mail refere juis PR fo konviksaun katak, grupu juiza koletivu ne’ebe halo desizaun iha kazu eis Ministra Justisa Lucia Lobato nian la tuir justisa no la tuir lei. E-mail ne’e mos fo evidensia ba saida mak advogado sira sempre koalia katak, Tribunal Rekursu la haree kacu Lucia Lobato ho justu, Juiz sira organiza an deit hodi obriga Lucia Lobato ba kadeia. Relasiona ho faktus hirak ne’e, defeza halo keixa hasotu juis ho deputadu ne’ebe envolve iha prosesu ne’e. Advogadu konsidera Juiz MNG komete krime rua hanesan krime Coacao de magistradu tuir artigu 283 kodigu penal no krime denegacao de justica hamutuk ho juiz nain rua inklui deputadu refere, tuir artifu 282 kodigu penal ho agravasaun numeru 3. 

“Ami haree aktu hirak ne’e, prova ona klaramente iha email refere katak juiz sira lakon pozisaun hanesan juiz no tenke hetan pena ba krime sira ne’ebe sira halo ona,” afirma Jose camoes. E-mail ne’e, Jose camoes informa katak, sira hetan juiz desembargadora Jubilada Margarida Veloso ne’ebe uluk hala’o kna’ar hanesan juiz inspector iha TL no Juiz ne’e desidi fo sai e-mail ne’e ba publiku hanesan denunsia, tanba ho prova ida ne’e no tau konsiderasaun ba prosesu ne’e tomak. 

 Iha parte seluk, Prezidenti Tribunal Rekursu Claudio Ximenes lakohi fo komentariu ba keixa ne’ebe advogado kondenada Lucia Lobato aprezenta ba Prezidenti Republika Taur Matan Ruak.

.