“Claudio Sei Foti Medidas Kontra Aniceto”

.

Jornal Nacional Diario - Sesta-Feira, 19 Abril 2013 

Prezidenti Tribunal Rekursu (TR), Claudio Ximenes, Kinta (18/4) mensiona katak, nia sei foti medidas legal hasoru deputado Aniceto Guterres ne’ebe akuza nia halo tentativa oi-oin atu fo liberdade ba kondenada Lucia Lobato. 

“Lia bosok sira ne’ebe Deputadu Aniceto Guterres fo sai iha komunikasaun social ne’e halo hau laran moras tebes, tanba halo foer hau nia naran no hau nia dignidade hanesan juis professional, liu-liu halo foer Tribunal Rekursu nia naran, tanba ne’e hau husu responsablidade hasoru deputadu Aniceto liu husi medidas legal,” afirma Claudio Ximenes liu husi konferensia imprensa iha Tribunal Rekursu, Dili. Claudio konsidera Deputado Aniceto nia deklarasaun iha komunikasaun social ne’ebe dehan nia promete ba prizioneira Lucia Lobato atu hasai nia husi kadeia, no uza nia poder hanesan Prezidenti TR hodi hasai Lucia Lobato no nia hamutuk ho advogado Lucia Lobato nian hodi ases juis sira seluk husi Tribunal Rekursu hodi bele hare faktu prizioneira Lucia Lobato nia prosesu habeas Corpus, ne’e la loos no falsu. 

 “Durante ne’e hau la fo razaun ba Lucia Lobato atu hasai nia husi kadeia no hau laiha interese ida atu favorese Lucia Lobato iha nia prosesu,” Claudio Ximenes esklarese hikas. 

Claudio mos esplika katak, husi inisiu kedas Prizioneira Lucia LObato la husu buat ida ba nia kona ba nia prosesu, tanba Lucia hateten katak, Presidenti TR ne’e sei la favorese nia iha prosesu nian. Claudio mos la hatene , motivasaun saida mak Deputadi Aniceto Guterres dada TR nian naran no nia rasik ba kazu ida ne’e, iha prosesu Lucia Lobato nia ne’e. 

“Iha koletivu ne’e, Juiza Maria Natersia Gusmao ho Juis Luis Goia mak tur ho hau hodi desidi, juis nain rua ne’e vota labele fo razaun ba Prizioneira Lucia Lobato ka hodi mantein nia nafatin iha kamara, hau vota katak iha TR nia desizaun sira uluk ne’e tuir hau la justu, tanba ne’e tuir ita nia konstituisaun no lei, Tribunal tenki fo razaun ba Lucia Lobato iha Habeas Corpus,” eslika Claudio Ximenes. 

 Nia mos esklarese katak, jusi sira tenki desidi prosesu ruma tuir faktus, tuir prova no tuir lei, atu kondena ka atu absolve ho justisa, juis tenki halo julgamentu ho justu, no juis sira mos tenki iha korazen atu la bele fo desizaun tuir presaun ne’ebe ema ruma halo ba nia. 

“Prinsipiu sira ne’e mak hau hanorin bah au nia juis sira iha Timor Leste, hahu iha tinan 200 to’o agora, prinsipiu sira ne’e maka hau tur loro-loron durante tinan 33 hau servisu hanesan juis,” katak Caludio Ximenes.

.