“FM Ezije Investiga Kilat Foun PNTL”

.

Jornal Independente - Kuarta-Feira, 24 Abril 2013 

Organizasaun Naun Govermental Fundasaun mahein (FM) konsidera prosesu sosa kilat foun Polisia Nasional Timor Leste (PNTL) ho marka PM2-V1 la klaru no laiha trasnparante, nune’e FM Eziji investiga lalais prosesu sosa kilat ne’e. 

 Antes ne’e, Sekretariu Estadu Seguransa Francisco Guterres mos deklara sei investiga prosesu sosa kilat ne’e, tanba konsidera prosesu hatama kilat ne’e illegal, sein iha konesementu husi konsellu Ministru. 

Adjuntu FM Joao Almeida hatete, kilat ho marka PMV2-V1 ba PNTL nian ne’e kontraversial tebes, tanba prosesu sosa kilat ne’e diretamente husi komandu PNTL nian, tuir FM katak, tuir lolos ne’e Governu maka iha kompetensia atu sosa kilat. Nia haktuir, iha loron 3 fulan-Setembru 2012 komandante Jeral PNTL Longuinhos MOnteiro fo sai ba publiku, komando PNTL sosa kilat husi PT. 

PINDAD-Indonesia hamutuk 75 ho numero seri 0001 to’o 00075, kilat refere premeiraves PNTL uza iha mundu, maibe iha loron tuir mai, komandu PNTL deklara numeru kilat aumenta hamutuk 77. FM husu kilat rua seluk ne’e mai husi ne’ebe?, tanba oras ne’e kilat ne’ebe hatama mai ne’e hamutuk 77. 

“Ami kestiaona kilat rua ne’e mai husi ne’ebe tan, ka ita sosa ou ne’e hanesan prejente ida ba Timor Leste tanba uluk Komisariu Longuinhos deklara sosa de’it kilat 75 maibe kilat ne’e to’o iha ne’e hamutuk 77 fali,” hateten ba Jornalista sira liu husi konferensia imprensa Balide (23/4). 

Polemika liu tan kona ba kilat PM2-V1, FM konsidera nuudar kilat neebe Guarda Floresta nian mak uza, maibe komandante Jeral PNTL, Longuinhos Monteiro rejeita totalmente katak kilat PM2-V1 nia rasik mak dezena, maibe dadus ne’ebe FM asesu komprova katak, kilat PM2-V1 nu’udar kilat Floresta Indonezia nian ne’ebe fo sai husi Portal PT. PINDAD nian rasik. Pior liu tan, FM kritika kilat ne’e tama mai iha aeru Portu labele halo revista ba kaixa sira ne’e, no komandante Jeral PNTL protesta atu kaixa kilat sira ne’e ba lalais PNTL nia liman. 

Tan ba ne’e FM husu atu investiga klean liu tan kona ba prosesu sosa kilat ne’e no tamba saida maka aeroportu labele halo pasarevista ba kaixa kilat nian ne’e. 

Nune’e mos, PT. PINDAD ne’e Governu Indonesia seidauk rekonese sai hanesan produsaun ba kilat nian.

,