“MS Seidauk Selu Estudante Medicina Iha Indonesia”

.

Jornal Independente - Sesta-Feira, 19 Abril 2013 

Governu liu husi Ministeriu Saude to’o oras ne’e seidauk trasfere osan ba estudantes medicina (Kedokteran) iha Indonesia durante tinan ida resin tanba kauza husi alterasaun sistema finansas publiku. 

Tuir dadus Ministeriu Saude identifka bolseiru medisina iha republika Indonesia hamutuk ema nain 150 ne’ebe seidauk simu osan husi governu Timor Leste (TL) liu-liu husi Ministeriu Saude ne’ebe hahu husi Jullu 2012 to’o ohin loron, baeia ba kontratu Governu kada estudante simu osan hamutuk U$4500 kada fulan 6. 

Diretor Rekursu Humanus Ministeriu Saude, Duarte Ximenes hatete normalmente prosesu transferensia osan bolseiru sira iha rai laran sempre halao dala rua kada tinan, maibe prosesu normal ne’e para tiha dezde fulan Jullu 2012. “Ami sei esforsu hodi finaliza prosesu ne’e iha tempo badak,” hateten Diretor Duarte ba Jornalista iha Ministeriu saude, Kinta horseik. 

Nia hatutan, laos Ministeriu Saude maka hakarak abandona estudante medicina sira iha Indoensia, maibe tamba sistema finansas publiku ba tinan ida ne’e iha mudans aoituan, ne’e mak fo impaktu ba estudante sira nia prosesu parendiazen iha Indoensia. 

“Ami simu duni lamentasaun husi ita nia estudante sira no agora ami sei prosesa hela dokumentus sira iha Ministeriu Financas hodi bele transfere osan ba sira iha tempo badak,” dehan nia. 

Entertantu, Komisaun F (Trata asuntu Edukasaun no Saude), Virgilio Hornai hateten, kestaun ne’e tenke hetan atensaun imediata husi Ministeriu saude tanba bele afeita ba prosesu aprendizazen estudante sira nian nomos fo impkatu negativu ba sira nia kualidade. 

Nia hatutan, problema transferensia osan ba bolseiru sira iha rai liur laos foin maka akontese iha Ministeriu saude, maibe inklui mos bolseiru sira seluk ne’ebe durante ne’e Ministeriu Edukasaun mak responsabliza, maibe tanba problema iha mudansa oituan kona ba ezekusaun financas nian ne’e mak fo afeita ba prosesu hirak ne’e. 

.