Hatama Osan Estadu Ba Konta Privadu “Joaquim Ho Familia 2 Sai Arguidu”

.

Jornal Timor Post - Sesta-Feira, 19 Abril 2013 

Tribunal Distrital Dili (TDD), Kinta (18/4) halo julgamentu ba funsionariu Ministeriu Finansas (MF) nain ida ho nia familia nain rua ne’ebe komete krime pekulatu no falsifikasaun agravadu hodi transfere osan estadu ho valor $346,712.33 ne’ebe tuir loloos atu selu ba asesor nasional, internasional no apoiu programa formasaun no bolsu estudu ba funsionariu sira. 

Liu husi audensia julgamentu Tribunal fo sai akuzasaun husi Ministeriu Publiku katak arguidu na’in tolu kompostu husi Joaquim Jose Maria Retivele da Cruz, Domingos Paixao da Cruz hanesan diretor kompania Brother Unipesoal Lda no Arguida Rosalina da Concecao Pinto hanesan fen kaben husi arguidu Joaquim, ne’ebe deskonfia alakon osan estadu ho total U$346,712.33. 

Iha akuzasaun hateten, arguidu Joaquim hanesan ofisial finansas iha planning and Financial manajement Capacity Building Program (PFMCBP) iha Ministeriu Finansas (MF). 

Hanesan ofisial Finansas iha PFMCBP nia arguidu joaquim maka normalmente prepara Letter of Debit ka orden pagamentu no dolkumentus suporta sira seluk no orsamentu husi programa PFMCBP ne’ebe hetan suporta husi nasaun duadores sira hanesan Australia, Nova Zelandia, Noruegia, Irlanda no Uniaun Europea no mos Banco Mundial ne’ebe superviziona husi Banku Mundial no MF. Orsamentu BFMCBP ne’e utiliza ba formasaun funsionariu sira husi MF, bolsu estudu ba funsionariu MF sira, selu ba asesor nasional no mos asesor internasional sira iha MF i selu mos 10% taxa ba asesor sira ba East Timor revenue Services (ETRS) ka servisu importu TL. 

Pagamentu bad ala sia ho total U$251,960.13 ba konta bankaria serviso importu TL ka East Timor Revenue Service iha Banku BNU ne’ebe arguidu joaquim dezvia tiha ba nia konta bankaria ho naran East Timor Service iha banku Mandiri. Hafoin ne’e Parte servisu impstu TL mai halo reklamasaun katak, PFMCBP-MF seidauk selu importu komesa husi fulan Marsu to fulan Dezembru tinan 2011, husi total orsamentu refere la iha ida mak tama iha konta bankaraia servisu impostu TL iha Caixa geral do Depozitu ka BNU Sukursal TL, maibe ikus mai deskobre katak, arguidu Joaquim dezvia tiha orsamentu refere sein iha autorizasaun ba iha konta bankaria ho numero 601000450398 ba iha Banku Mandiri ho naran East Timor Servoces no nain mak arguidu Joaquim. 

Nune’e mos, Arguidu Joaquim dezvia tiha orsamentu ho total U$91,552.20 husi PFMCBP ba arguidu Domingos Paixao nia konta Bankaria iha banku ANZ ho numeru 1012097478001 ho naran Brother Unipessoal Lda. 

Tuir loloos orsamentu refere atu haruka ba konta bankaria asesor internasional nain rua iha MF, maibe arguidu Joaquim haruka fali ba arguidu Domingos nia konta bankaria iha ANZ ho naran Borther Unipessoal Lda. Arguidu Rosalina hanesan funsionariu iha ONG Belun MP notifika hanesan arguida tanba Rosalina hatene katak, nia kaben Arguidu Joaquim hanesan deit funsionariu (ofisial finansas) ho salariu mensal U$947.30 la iha kapasidade finanseiru osan ho montante barak hanesan ne’e, maibe arguida Rosalina livremente hakarak esforsu no ho intensaun ho Arguidu Joaquim atu uza osan sira ne’e ba arguidu sira nia privadu. 

 Arguida Rosalina mak ajuda nia kaben arguidu Joaquim halo levantamentu hodi entrega Check ho montante U$7,500.00 ba Jacinto Simao hodi sosa kareta ho marka pazero no arguido sira mos uza osan estadu ho total $72,950.00 halo konstrusaun ba uma iha Lospalos no uma iha Tuana laran. 

 Ho hahalok sira ne’e arguidu Joaquim MP akuza hanesan autor material ho forma konsumadu i konkursu real komete krimi pekulatu, ho forma kontinuadu ne’ebe previstu i punidu tuir artigu 1 no 3 kodigu penal Timor Leste, no krime faslifikasaun agravado ho forma konstinuadu ne’ebe previstu iha punidu tuir artigu 304 numeru 1 no 2 kodigu penal Timor Leste. 

Arguidu Domingos no arguida Rosalina akuza hanesan autor material komete krime brankeamentu kapital ne’ebe vistu i punidu tuir artigu 313 numeru 1 alinea a, b no c kodigu penal Timor Leste. Audensia julgamentu ne’e lidera husi juis kolektivu Ana Paula Fonseca, Jacinta Coreia, Julio Gantes, Ministeriu Publiku reprejenta husi Procuradores Vicente Brites no Oscar Silva Tavares no arguidu nain tolu hetan defesa husi advogadu Jose Pedro Camoes.

.