Sarani Sira Tuda Rahun Vidru Edifisiu UK Sao Paulo II “Pe. Apolinario Husu Sarani Kalma”

.

Jornal Nacional Diario - Segunda-Feira, 08 Abril 2013 

Sarani Igreija Imaculada da Conceicao Balide tuda rahun vidru edifisiu Universidade Katolik (UK) Sao Paulo II ne’ebe harii iha Balide, Dili tanba la satisfas ho desizaun Dioseze Dili nian nebe harii edifisiu Universidade ne’e ateru mos rai nebe tama liu ba rai parte igreija Balide nian. 

Akontesementu ne’e akontese iha Sabadu (6/4) meudia wainhira sarani sira la simu desizaun Dioseze Dili nian nebe sobu moru Igreija Balide nian hodi ateru rai tama liu ba Igreija Balide nian. 

Iha akontesementu ne’e edifisiu foun Universidade Katolika Sao Paulo II Vidru Parte Oeste mak rahun, nune’e mos sarani sira tau espanduk ne’ebe hakerek “Sarani Parokia Balide la simu desizaun husi Diocese nian hodi halo konstrusaun nebe tama liu ba iha baliza, rai parte igreija nian no sarani sira eziji tenki iha klarifikasaun husi Diocese Dili’. 

Alende ne’e mos padre sira husi parokia Balide mos husu ba sarani sira ne’ebe lakohi atu sobu moru igreija Balide nian ne’e asina naran iha spanduk nebe prepara ona. Parokia Imakulada sa Conceicao Balide Dili ho sarani kuaze 29.000 husi Lahane, Santa Cruz, Balide, Taibesi, iha Domingo (7/4) asina naran iha spanduk nebe tau iha igreija balide nuudar jestu rejeita atu Diocese Dili sobu moru Igreija nian hodi uza ba haluna Universidade ne’e. 

Iha oportunidade ne’e, sarani sira balu dehan, Universidade Katolika ne’e harii mos aban bainrua sira nia oan eskola mos selu labele, tanba karun. 

“Eskola Katolika deit mos selu karun ona, satan Universidade Katolika,” dehan sarani ida ho hirus. Universidade Katolika Sao Paulo II ne’e konstrusaun hahu iha tinan 2012 ne’ebe edifisiu balun konklui ona maibe atu loke tan espasu mak hodi sobu moru Igreija Parokia Balide nian ne’e mak foin mosu problema. 

Hata’an kona ba konstrusaun ne’ebe mak halao hodi tama liu ba baliza Igreija balide ninian, Vigario Geral Diocese Dili, Padre Apolinario Guterres hateten, antes ne’e iha ona lina kordenasaun entre Igreija Balide nian ho Diocese, nune’e ho problema ne’ebe mak iha sei rejolve ho diak liu tan tanba nu’udar ihreija Diocese ninian. 

 “Amo Bispo haruka nia padre iha Parokia atu ukun iha Diocese nia laran, entaun buat hotu tenki rona husi orientasaun ne’ebe mak Amu Bispo fo, ba problema ne’e iha buat balun karik, nuudar familia buat hotu-hotu iha planu, kordenadu, sarani sira tenke hakmatek,” dehan Vigario Geral Diocese Dili, Padre Apolinariu Guterres ba Jornalista sira, sabadu (06/4) iha Parokia Imaculada da Conceicao Balide, Dili. 

Entertantu, iha fatin hanesan, Padre Deometrio Barros, Amu parokia Igreija Balide nian husu sarani sira tenki hakmatek, obdese, sarani ne’ebe mak fiar nain ba kristu maromak, liu husi nia reprezentante ne’ebe mak iha. 

 Amo Paroku ne’e hatutan tan katak, Bispo Diocese Dili, Dom Ricardo nian esforsu maka’as liutan ba ita rai ne’e, atu hadia kapa’as liu tan ita nia igreija ne’e nia buras, nune’e rai doben Timor nia oan sia tenki matenek no sai sarani ne’ebe diak.

.