“Deskonfia Emilia Involve Tan Kazu Edifisiu Munisipiu”

.

Jornal Independente - Kinta-Feira, 04 Abril 2013 

Ministra Finansas Emilia Pires presta deklarasaun iha Komisaun Anti Korupsaun (KAK) tanba deskonfia envolve tan kazu alokasaun orsamentu ba projeitu harii edifisiu Kamara Munisipiu. 

Ministra Emilia Pires aprezenta an iha KAK tuku 9:05 Otl dader Kuarta (3/4) ho kareta modelu Toyota RAVA ho nia matrikula 00006 G. 

Tuir fontes importante husi instituisaun estadu ida hateten ba INDEPENDENTE katak, KAK bolu Ministra Emilia nu’udar testamunha, deskonfia Ministra Emilia aprova osan husi item ida nian hodi uza ba harii fali edifisiu Kamara Munisipiu la tuir BOQ. 

Nia dehan, tuir BOQ osan ne’e atu aloka ba dezenvolvimentu instituisaun estadu nian ida, (fontes la temi instituisaun nia naran), maibe aloka fali ba harii edifsiu kamara munisipiu, hanesan Distritu Bobonaro, dili, Baukau no distritu seluk. 

Fontes kredivel ne’e mos la temi total orsamentu ne’ebe Ministra Emilia aloka ba projeitu harii munisipiu ne’e. Tuir observasaun diraiu ne’e, bainhira Ministra Finansas ne’ebe zere osan estadu ne’e aprezenta iha KAK, nia dehan ba ofisial KAK katak nia hakarak hasoru komisariu KAK depois investiga. 

Maibe, ofisial KAK ne’e dehan, regras KAK nian bandu atu ema ne’ebe hetan investigasaun husi KAK hasiru malu ho komisariu. 

Hafoin presta deklarasaun, durante oras tolu nia laran, Ministra Emilia lakohi fo nia komentariu ba media sira. 

Aliende involve iha kazu alokasaun orsamentu harii munisipiu, antes ne’e mos KAK investiga ona Ministra Emilia kona ba kazu deskonfia aprova orsamentu ba nia kaben Warren MCleod nudar direktur kompania Mac’s Metal Craft hodi fornese kama ba ospital nasional guidu valadares iha tinan 2012. 

Informasaun ne’ebe mak diariu ne’e rekoilla, KAK mos sei bolu eis Vise Ministra Saude Madalena Hanjam hodi halo investigasaun tanba pedidu sosa kama ba Ospital Nasional Guido Valadares ne’e mai husi MS anterior.

.