Kazu Osan Lakon Iha BNU Baucau “Dom Basilio: Amu Lulik La’os Naok Ten”

.

Jornal Nacional Diario - Segunda-Feira, 08 Abril 2013 

Bispo Diocese Baucau nu’udar mos Prezidenti Konferensia Eoiskopal Timor Leste, Mgr. Basilio do Nascimento fo sasin katak, notifikasaun ne’ebe mak Ministeriu Publiku halo ba padre nain tolu nu’udar arguidu la’os naok ten. 

 Tribunal Distrital Baucau (TDB), sesta foin lalais ne’e halo ona primeiru julgamentu ba kazu osan lakon iha Banku Nacional Ultramarinho (BNU) Sukusal (filial-red) Baucau, hodi aprezenta padre nain tolu hanesan arguidu, padre nain tolu ne’e maka, Padre Germano Gusmao, Padre Mario de Carvalho Soares ho Padre Domingos M. Guntao Guterres. 

Iha julgamentu ne’e, Tribunal la konsege aprezenta arguidu prinsipal nain rua, Agustinho Gusmao ne’ebe oras ne’e kondisaun saude la diak (moras) no arguidu Joao Goncalves ne’ebe detein ona iha prizaun preventiva Becora. Arguidu prinsipal Agostinho Gusmao nu’udar eis Diretor BNU sukursal Baucau no Joao Goncalves hanesan mos eis funsionariu importante iha BNU Dili. 

 “Oportunidade ne’e hau mos hakarak fahe informasaun ruma konaba padre nain tolu ne’ebe mak Tribunal bolu hanesan arguidu, ema hotu hanoin katak, padre nain tolu ne’e mos naok ten, maibe hakarak esplika lolos iha ne’e katak, padre nain tolu ne’e, nain rua seluk, simu osan ne’e tanba arguido prinsipal sira lori osan nauk ne’e ba selu tusan ne’ebe sira deve iha padre nain rua ne’e, no padre nain ida seluk simu osan husi arguido prinsipal sira ne’ebe husu ba padre ne’e atu rai hela osan ne’e, maibe padre nain tolu lahatene osan ne’e arguidu prinsipal sira foti husi ne’ebe,” esplika Bispo Basilio do Nascimento ba sarani sira liu husi misa Domingu (7/4), iha Igreija Katedral Diocese Baucau. 

Dom Basilio klarifika mos katak, selu tusan, ema hotu hakarak osan ne’e tau fali iha nia fatin, no ida seluk ba husu dehan, Amu rai hela nia osan, depois mak mai foti, mas, kuandu ema hetan fali osan ne’e hodi husu tun sa’e, katak osan sira lakon ne’e ba iha ne’ebe, automatikamente ema ne’ebe lori osan ne’e hateten katak, hau fo osan sekiak ba ida ne’e no osan sekian ba ida ne’eba, maibe la hatene tan sa. 

Nune’e duni, tuir Amu Bispo Basilio, Tribunal kuandu hetan situasaun ne’e laos haree Amo Lulik ka oinsa-oinsa, mas buat ne’ebe Tribunal hakarak mak halo nusa mak osan ida ne’e husi liman ida ne’e ba para fali iha liman ida ne’eba. 

“Amo lulik laos naok ten, maibe ba esklarase situasaun ida ne’e iha Tribunal kona ba oinsa mak osan ne’e iha ema ida nia liman monu to’o iha Amu Lulik nain tolu ne’e nia liman laran,” Afirma Dom Basilio do Nascimento. 

Iha oportunidade ne’e, Don Basilio hateten, buat ne’ebe mak fo sai iha televizaun halo ema barak hanoin kedas dehan, kuitadu amu lulik nain tolu ne’e mos hatama liman ba buat ne’ebe laos sira nian.

 “Hau bele asegura katak, Amo Lulik nain tolu ne’e liman mos, keta manfgame tun mangame sae, la’e orsida ema hanoin katak, Amo sira mos buat lalos hotu,” Amo Basilio dehan tenik.

.