Deputadu Aniceto Guterres VS Claudio Ximenes “Dun TT Mos Hatama Kanuru Tohar”

,

Jornal Nacional Diario - Sesta-Feira, 19 Abril 2013 

Kazu hatudu liman ba malu (tuding-menuding) entre Advogadu Prizioneira Lucia Lobato nian, Jose Pedro Camoes, hasoru Juiz internasional Rui Penha ho Luis Goia no Juiza Maria Natercia Gusmao inklui nia kaben Aniceto Guterres, nu’udar Membru Parlamentu Nasional (PN) husi Bancada FRETILIN ne’ebe ikus mai akuza mos Prezidenti Tribunal Rekursu (TR), Claudio Ximenes, komesa da’et ona ba to’o iha Timor Relecom (TT). 

Indikadores ne’ebe advogado Jose Pedro Camoes, nudar lowyers kondenada Lucia Lobato nia kaer tomak hodi dehan, TT mos hatama kanuru tohar iha kazu ida ne’e, tanba abertamente fo print out ema nia komunikasaun privadu via Telemovel ba Deputadu Aniceto Guterres. 

 Iha Printi out TT nian ne’ebe sai baze fundamental ba deputadu Aniceto Guterres hodi defende an no akuza Prezidenti Tribunal Rekursu (TR), Claudio Ximenes, mos envolve halo tentative oi-oin atu fo livre ba kondenada Lucia Lobato, halo Advogado Jose Pedro Camoes, preokupa no taridu, tanba TT viola lei no direitu konsumidores sira nia hodi la garantie privasidade kliente nian. 

 Ba JNDiario, iha Tribunal Distrital Dili (TDD), Kinta (18/4), Advogado Jose Camoes, espera katak, nia parte duvidas boot ho empreza Timor Telecom, tanba la respeitu kliente sira nia direitu no segredu komunikasaun. Pedro Camoes esplika katak, to’o agora seidauk iha lei ida atu regula no defini kona ba penyadapan, maibe iha lei nasional katak, Timor telecom bele fo sai print out numeru telefone no ema seluk nia komunikasaun wainhira hetan orden husi Tribunal, Tuir Pedro camoes, atetude loke komunikasaun ema seluk nia ne’e kontra lei iha prosedimentu kriminal nian. 

 “Ami mos iha provas balun, maibe ami husi Tribunal mak loke komunikasaun hotu-hotu ne’ebe involve iha konspirasaun ba desizaun habeas Corpus ba kondenada Lucia Lobato,” Pedro Camoes sublinha hikas. 

Nia hatutan, individu balun nuudar staf TT nian mak involve iha print out ida ne’e, tenki hetan mos investigasaun, tanba viola lei no halo krime boot hasoru kliente TT. Husi sorin seluk, Primeiru Vice Prezidenti parlamentu Nasional, Adriano do nascimento hateten katak, iha lei hateten ona, estadu maka iha direitu atu husu Print out husi operador telekomunikasaun sira hafoin hetan desizaun no autorizasaun husi Tribunal Rekursu. 

 “Koalia ona ba estadu, so iha desizaun husi Prezidenti Republika, desizaun husi Tribunal rekursu no Parlamentu ba interese estadu nian maka bele husu print out husi operador Telekomunikasaun sira, ema ida labele halo sasan sira hanesan ne’e,” esplika Adriano do Nascimentu. Adriano Nascimento konsidera alastramentu Print out numeru komunikasaun ne’ebe monu to’o Deputadu Aniceto Guterres nia futar liman ne’e seriu oituan, tanba ema bele livremente asesu ema seluk nia komunikasaun segredu iha Timor Telekom. 

 “Iha lei garantie ema ida-idak nia privasidade, ema nia segredu labele tau fali ba publiku no halo fali konsume politiku,” afirma Adriano do Nascimento. Deputadu ne’e mos husu ho fuan boot no sentidu estadu nian hodi husu ba operador telekomunikasaun sira ne’ebe eziste iha Timor Leste atu respeita kliente sira nia segredu no privasidade. 

Husu mos ba Ministru Transporte no Komunikasaun atu tau atensaun seriu ba situasaun sira hanesan ne’e hodi tane estadu nia segredu no asegura klientes sira nia direitu ni privasidade. 

.