Artemarsiais Hahu Manas “PN Husu Monta Estadu de Sitiu”

.

Jornal Nacional Diario - Kinta-Feira, 04 Abril 2013 

Parlamentu Nasional husu ba Governu atu monta lalais ona Estadu de Sitiu iha rai laran, tanba povu, liu-liu joventude barak mak mate ona tan deit artemarseais sira nia hahalok. 

Tuir membru Komisaun B PN ne’ebe trata asuntu Defesa, Seguransa no relasoens externa, Cesar de Jesus katak, durante ne’e iha kazu barak ona mak rezulta ema mate barak iha teritoriu laran tomak. 

 “Ami komisaun B ami senti katak, lolos ne’e ita halo ona situasaun ida ita koalia estadu de Sitiu ne’e hanesan meus briliante ida atu ema labele halo movimetasaun arbiru iha tempo kalan. Husi PN rasik mos eziji ona atu artemarsiais sira ne’ebe la kumpri regulamentu, diak liu taka, no Primeiru Ministru Kay Rala Xanana Gusmao rasik mos koalia ona katak, tenki taka artemarsiais ne’ebe gosta kria hela deit problema. 

 “Aksaun oho ema seluk ne’e hanesan kriminal, pior liu ona kuandu governu dehan taka tiha ona artimarsiais maibe sira kontinua halo nafatin krime hanesan ne’e,” dehan Cesar. 

Nia mos hatutan tan katak,” situasaun ida ne’e grave, halo povu tomak la kontenti, tanba Timor oan sira mate durante tinan 24 nia laran atu manan independensia, tanba sa mak sei kontinua mate nafatin iha tempu liberdade nia laran, tenki tau duni estadu de Sitiu,” sujere deputadu CNRT ne’e. 

Cesar deskobre tan katak, problema artemarsiais ne’e husi parte instituisaun Polisia mos iha membru balun envolve an iha laran, tanba ne’e polisia sira labele halo buat ida kuandu artemarsiais sira provoka situasaun. 

 “Polisia sira, Governu fasilita tiha ona buat hotu ba sira hanesan transporte no buat hotu-hotu, maibe sira nunka lao atu kontrola rai laran durante oras 24 nia laran, ida ne’e mak inkapasidade sira nian, pior liu tan sira balun involve iha artimarsiais,” dehan deputadu Cesar. 

,