“Soe-An Tanba Hanoin Barak”

.

Jornal Timor Post - Kinta-Feira, 04 Abril 2013

Bolseiru Timoroan Ilidio dos Reis ne’ebe mak estuda iha Portugal Soe-an husi uma andar iha Portugal tanba deskonfia hanoin barak ho familia nia susar. 

Matebian husi Uaitame-Mulia, Sub Distritu Quelikai, Distritu Baucau, durante ne’e nia halo estudu iha Portugal hafoin hetan konfiansa husi Ministeriu Edukasaun (ME) hodi ba hasa’e kapasidade maibe maromak nia planu oin seluk. 

Tuir matebian Ilidio nia kolega, Bazhy M. Conetrao iha facebook fo sai informasaun sobre nia mate katak, matebian so’e-an husi uma andar iha segunda loron 1 fulan Abril. 

“Nia hanoin barak no S3 (stress) duni tanba nia apa mate tiha, la kleur iha nia alin ida saka tiru mate tiha, tuir mai nia inan kareta soke mate tiha, i foin dadauk ne’e nia alin mate tan, ho nune’e mak halo nia hodi foti desizaun ida ne’ebe ita hotu la espera ne’e,” hateten Bazhi iha Facebook. 

 Tuir nia maluk sira fo sai, estudu besik remata ona maibe la espera atu hetan asidenti ida ne’e tanba ne’e ho laran luak husu ba Governu Timor Leste atu apoiu finanseiru no rekrusu hodi lori hikas mate isin mai Timor-Leste hodi halot hamutuk ho nia familia ne’ebe mak maromak bolu uluk ona hodi hakoi tuir tradisaun Timor. 

Ho akontesementu ne’e, jornalista koko konfirma kedas ba Ministeriu negosiu estranjeiru no koperasaun (MNEK) liu husi Vice Ministru Constancio Pinto iha nia kna’ar fatin, nune’e nia hateten, looos duni estudante ne’e soe an husi andar leten, agora dadaun mate isin sei rai hela iha Portugal hodi hein prosesu transladasaun. 

 Sikun seluk mos, Minitru Edukasaun Bendito Freitas dehan, ME seidauk hatene klaru motivu husi asidenti ne’e.

.