“Projeitu Mate Klamar Mosu Iha Distritu Ermera”

.

Jornal Nacional Diario - Segunda-Feira, 08 Abril 2013 

Komisaun E Parlamentu Nasional (PN) ne’ebe trata assuntu Infraestrutura, Transporte no Komunikasaun, konsege deskobre projeitu balun iha Distritu Ermera hanesan Projektu mateklamar iha fiskalizasaun, tanba kompania ne’ebe ka’er projeitu ne’e iha reijaun Distritu Ermera rasik la hatene, no mai husi instituisaun ne’ebe mos sira la hatene.

Tuir Prezidente Komisaun E PN, Pedro Martires katak, objetivu husi vizita ne’e atu komisaun fiskaliza projetu fiziku sira ne’ebe la’o iha Ermera laran, liu-liu Dezenvolvimentu infraestrutura ne’ebe programadu tiha ona, maibe iha fiskalizasaun Komisaun E nia ne’e haree katak, iha projeitu balun ne’ebe la’o kapa’as tebes no projeitu balun mak lao la dun diak. 

“Ita haree projeitu sira ne’e balun remata tiha ona no nia kualidade ne’e la aat liu maibe diak, iha projeitu balun mos ita haree la’o la diak, maibe komisaun E sei kontinua fiskaliza nafatin projeitu sira ne’e, atu nune’e bele la’o tuir buat ne’ebe mak ita espera,” dehan Pedro. 

Alende ne’e, Deputadu Osorio Florindo, husi Bancada FRETILIN hateten katak, sira ejiji nafatin atu hatene lolos lalaok projektu ne’e, tanba sira lakohi atu ulun moras iha tempu pagamentu, nia dehan, kuandu lahatene projeitu ne’e mai husi ne’ebe no kompania ne’ebe mak kaer sei mosu problema iha loron ikus, no Parlamentu mak sei ulun moras. 

“Hau hanoin funsionariu mate klamar deit mak iha, maibe afinal projeitu mate klamar mos iha, projeitu ida ne’e kompania ne’ebe kaer mos sira lahatene, oinsa mak ital abele kestiaona,” katak Ososrio Florindo ba Jornalista sira foin lalais ne’e bainhira halo fiskalizasaun iha Distritu Ermera. 

Nune’e, Deputadu sira husi komisaun E kontinua halo fiskalizasaun ba edifisiu Solidaridade Distritu Ermera ne’ebe kaer husi kompania Golden Sunrise ho montante orsamentu milaun 300 USD, projeitu ne’e seidauk remata maibe buat barak mak aat fali ona. Komisaun E mos kontinua halo tan fiskalizasaun ba Construsaun centro Comunitaria Railaku Leten, Aldeia Busagoa, ne’ebe kaer husi kompania Doben Unipesoal ho montante orsamentu U$13,836,80. Projeitu remata tiha ona maibe kompania seidauk selu ema sira ne’ebe mak servisu iha projeitu ne’e.

,