“Parlamentu Bolu Ministra Emilia Pires”

.

Jornal Independente - Sesta-Feira, 05 Abril 2013

Parlamentu Nasional (PN) liu husi komisaun C (trata asuntu) finansa no Anti Korupsaun bolu Ministra Finansas Emilia Pires hodi resposabliza sistema pagamentu ba orsamentu estadu ne’ebe atraza.

 Hafoin sorumutu, Prezidenti Komisaun C Parlamentu Nasional, Virgilio Marcal hateten, sira bolu Ministra Finansas tanba hetan keixa barak husi Ministeriu no Sekretariu Estadu balun katak, sistema pagamentu osan estadu atraza tebes.

 “Tanba ne’e mak ami bolu Ministeriu Finansas (ministra Finansas) mai esplika kona ba sistema pagamentu ne’e oinsa los,” dehan Virgilio ba Jornalista iha PN horseik. Pagamentu ne’ebe tarde, Virgilio dehan, bele afeita ba ezekusaun orsamentu Jeral Estadu (OJE) 2013 nian.

“Ami tauk mak ne’e, keta halo orsamentu estadu (2013) ho montante boot ne’e labele ezekuta hotu tuir planu ne’ebe trasa tiha ona,” dehan Virgilio.

Maibe, Virgilio dehan, MF hataan sistema pagamentu foun (online) ne’ebe uja ne’e modernu, nune’e mka funsionariu ministeriu sira seidauk hatene utiliza. Teknikamente, deputadu ne’e mos la eslika datailu sistema pagamentu foun modernu liu husi online ne’ebe ministeriu finansas utiliza.

Entertantu, Ministra Finansas Emilia Pires lakohi fo komentariu ba media, antes ne’e mos forum editor husi media privadu sira boikota ona nia aktividade durante nia sei la husu deksulpa ba media iha publiku, relasiona ho nia deklarasaun iha Parlamentu Nasional katak, media manipula informasaun hodi hatun ema seluk.

Virgilio dehan tan, MF halo halo ona terinamentu barak ba funsionariu husi Ministeriu hotu maibe sira mak seidauk kumpriende didiak uza sistema pagamentu foun ne’e. Sistema pagamentu foun, Virgilio dehan, Ministeriu Finansas konfesa katak, bele minimiza mos korupsaun.

Tanba ne’e, nia hatutan, Ministeriu hotu-hotu tenki hatene sistema pagamentu foun ne’ebe mak iha hodi nune’e futuru labele mosu tan preokupasaun.

,