“Tribunal Husu Hasai Imunidade Francisco Borlaco”

.

Jornal Nacional Diario - Sesta-Feira, 05 Abril 2013 

Iha loron 20 fulan Fevereiru, tinan nee, Tribunal Distrital Dili (TDD), haruka ona karta notifikasaun ba Parlamentu Nasional (PN), Primeiru Ministru (PM) ho Director Jeral Ministeriu Finansas, atu hasai Sekretariu Estadu Fortalesimentu Institusional (SEFI), Francisco da Costa Soares ‘Borlaco’ nia imunidade, maibe to’o agora Parlamentu Nasional seidauk fo resporta ba Tribunal. 

Francisco Borlaco ne’ebe uluk iha IV Governu Konstitusional assume kna’ar Director Jeral Ministeriu Finansas, deskonfia komete krime abuzu poder ho fraudia fiskal. 

Tanba ne’e, mak Tribunal husu atu hasai tiha ninia imunidade hodi bele submete ba primeiru julgamentu ne’ebe ajenda ona atu hala’o iha loron 28 fulan Maiu tinan ne’e. 

 “Juis ne’ebe prosesa kazu ne’e informa mai katak, sira haruka ona karta ba autoridade kompotente atu hasai imunidade Francisco Borlaco nian atu bele submete iha primeiru julgamentu, maibe to’o agora seidauk hetan resposta husi Parlamentu Nasional,” Informa Juis Administrador TDD, Duarte Tilman ba jornalista sira iha TDD, kinat (4/4). 

 Duarte Tilman esplika katak, wainhira PN ho konsellu Ministru simu ona karta ne’e tuir lolos tenki resposta kedas iha loron lima nia laran, konta husi loron ne’ebe sira simu surat ne’e, maibe to’o agora laiha resposta. 

Tipu krime mak abuju de poder no fraudio fiskal ne’ebe previstu ona iha artigu 314 Codigu prosesu Civil hatete, ema ne’ebe atu la selu totalmente impostu, taxa ka oubrigasaun petuniaria fiskal ne’ebe tenki selu ba estadu, tanba, a). la deklara faktu ne’ebe serve fo fatin ba tributasaun neebe presiza atu halo liquidasaun. b). Deklara inkoretemente faktu ne’ebe serve hanesan baze ba tributasaun. C). Impede ho meiu naran ida ka sonege element nesesariu atu halo fiskalizasaun ba aktividade ka faktu ne’ebe fo fatin ba tramitasaun ajente ne’e sei hetan pena tinan 2 to’o 6 kadeia. d). kuandu kuatia devida sei a’as liu U$5.000 ajente ne’e sei hetan kastigu tinan 2 to’o 8. Kazu Francisco Borlaco nian ne’e registu iha TDD iha loron 24 fulan janeiru 2013 ho numeru prosesu 02/13/TDDIL. 

,