“Aniceto Guterres Rezeita Involve Kazu Lucia Lobato”

.

Jornal Nacional Diario - Kinta-Feira, 18 Abril 2013 

Deputadu Parlamentu Nasional (PN) husi bancada FRETILIN, Aniceto Guterres, rezeita involve diretamente iha kazu kondenada eis Ministra Justisa, Lucia Lobato, ne’ebe akuza husi nia advogado Jose Camoes. 

Aniceto Guterres hateten, nia ho nia kaben Juiza Maria Natersia Gusmao ne’ebe hasai ona desizaun abeas korpus ba kazu Lucia nian, lalos, tanba nia ho nia fen kaben la influensia ka tau interese ba kazu ne’e. 

 “Iha Jornal sira nia head line news ne’ebe Senor Jose Camoes adovadu kondenada Lucia Lobato nian, akuza hau nu’udar deputadu halo krime ida denegasaun justisa, no ohin hau simplismente hanesan deputadu hau atu halo defesa de honra,” deklara Aniceto Guterres liu husi konferensia ba imprensa iha Parlamentu Nasional, Kuarta (17/4). 

Aniceto reafirma katak, nia sai vitima ba sira nia konspirasaun ho sira nia jogu de interese iha Tribunal, maibe nia dehan, se laiha prova ida atu kondena nia (Aniceto), nia husu ba Ministeriu Publiku atu prosesa lalais kazu ne’e, tanba sei to’o momentu ida ba nia atu hatama fali keixa ida kona-ba denunsia kalunioza, atu ezizi nia naran diak no reputasaun. 

“Hau la interese buat ida iha kazu Lucia LObato nian, nu’udar jurista hau interese ba sistema justisa, se mak iha interese liu ba kazu senora Lucia Lobato nian ne’e, ita tenki haree no agora ita ke malu ona,” informa deputadu Aniceto Guterres. 

 Aniceto Guterres haktuir katak, kazu Lucia Lobato nia ne’e hatudu momos no klaru ona katak, hanesan tentativa ida atu harahun sistema justisa, no atu desakredita justisa TL nian liu husi maneiras sira hanesan ne’e. Aniceto hatutan, iha akuzasaun ne’e hateten katak, nia partisipa iha alterasaun distribuisaun ba prosesu iha Tribunal, ne’e falsu. 

Iha okaziaun ne’e, Aniceto hateten, sira hakarak halimar ahi, maibe ahi ne’e sei fila an fali ba sira, tanba sira tenki aprezenta faktus kona ba oinsa? Hori bainhira? Iha ne’ebe nia (Aniceto) ba influensia kazu Lucia Lobato. Aniceto mos kestiaona, bainhira jusi koletivu hasai desizaun rekursu ordinariu nian, Prezidenti Tribunal Rekursu (TR) Caludio Ximenes mos kritika no ataka makaas juis sira ne’ebe maka hasai desizaun ne’e, ida ne’e hatudu ona nia pozisaun katak nia a favor apoia Lucia Lobatu. 

Tuir Aniceto, Prezidente Tribunal Rekursu Claudio Ximenes mos halo promesa ba kondenada Lucia Lobato katak, nia sei haree fila-fali Lucia Lobato nia kazu ne’e hodi liberta nia, tanba ne’e atu kumpri nia promesa, nia uza nia pozisaun nuudar Prezidenti Tribunal halo tun sae. Nia realsa, prosesu normal ba ema kiik, sira iha Tribunal ohin loron, kuandu desizaun Tribunal Rekursu sai ona ne’e tranzitadu enjulgadu, tanba ne’e final ona, no kazu ne’e hotu iha ne’e, maibe ohin loron rekursu Lucia Lobato nian ne’e la para. 

Aniceto esplika, agora dadaun ne’e mos rekursu extra ordinaria ida ho abias kopus ida tama tan ona iha Tribunal Rekursu ba kazu Lucia nian de’it, hahalok sira hanesan ne’e, nia dehan, iha mundu tomak sei la tolera juiz sira hanesan ne’e, tanba prejudika imparsialidade ho independensia juis nian. Aniceto dehan, Juiz hotu-hotu iha mundu iha dever tomak atu marka nia pozisaun nudar ema ne’ebe independente no imparsial. 

 “Oinsa mak juis Prezidenti ida nia halo kontaktu frekuentemente ho arguida ne’ebe nia prosesu lao namanas hela iha Tribunal ne’ebe nia lidera, ida ne’e so akontese iha Timor Leste,” dehan Aniceto. 

Antes ne’e, advogado kondenada Lucia Lobato, Jose Camoes akuza deputadua inisial AG no Juis MNG deskonfia envolve iha kazu Lucia Lobato nian atu enkomeda Juiza ida hodi hola parte iha koletivu ba desizaun habeas corpus ne’ebe ekipa advogado Prizioneira Lucia Lobato hatama hodi mantein nafatin Eis MJ ne’e iha kadeia. 

.