Arguido Salvador Tenta Halai: “Tribunal Julga Eis Milisia Pro-Otonomi”

.

Jornal Nacional Diario - Kinta-feira, 04 Outubru 2012 

Tribunal Distrital Dili (TDD), Kuarta (03/10), hahu hikas julgamentu ba autor krimi graves kontra humanidade ne’ebe akontese tinan 1999 Pasca Konsulta Popular. 

 Iha Julgamentu ba kazu krime graves ne’e, Ministeriu Publiku aprezenta arguido nain tolu ne’ebe iha tinan 1999 sai hanesan milisia Pro-otonomi husi grupu Besi Merah Putih (BMP) iha Suku Ulmera, Sub Distritu bazartete, Distritu Liquisa. 

 Arguido sira ne’e mak, kompostu husi Faustinho Filipe, nudar komandante BMP no assume mos knaar Kepala desa (KADES) Ulmera, Salvador de Jesus, nuudar mos komandante BMP iha Ulmera, ho Miguel Soares nudar Membru BMP iha Ulmera. 

Arguido nain tolu ne’e, deskonfia komete krime humanidade hodi oho Felis Bareto ho Francisco Braz iha Suku Ulmera iha tinan 1999. Notifikasaun ne’ebe lee sai husi Juiz Anna Paula Fonseca iha julgamentu ne’e katak, arguido nan tolu ne’e deskonfia oho vitima Felis Barreto ho Francisco Braz nudar ativista rede klandestina ba ukun rasik an (Pro kemerdekaan).

 Iha jukgamentu ne’e, Arguido Faustino Filipe deklara katak, nia la hatene Feliz no Francisco nia mate, tanba nia to’o tiha Timor Osidental mak foin rona Felis no Francisco nia mate. 

 Julgamentu ba kazu ne’ebe rejistu iha Tribunal ho numero prosesu 282/C.ord/2012 ne’e, hadia hikas atu rona tan deklarasaun husi testamunha sira. 

.