“UEP Konsidera SES Halo Promesa Falsu”

.

Jornal Independente - Kinta-feira, 04 Outubru 2012 

Unidade Espesial Polisia (UEP) deskobre ho deklarasaun Sekretariu Estadu Seguransa (SES) no konsidera halo promesa falsu, tanba to’o oras ne’e seidauk iha kondisaun ba sira atu muda husi sira nia fatin iha Fatiuhada, Komoro, Dili. 

Komandante Unidade Espesial Polisia (UEP), Superintendente Afonso do santos hateten, deklarasaun SES, Francisco Guterres katak, nia prepara ona fatin foun ba Polisia UEP hodi sai husi Fatuhada, maibe realidade hatudu katak, to’o ohin loron seidauk iha kondisaun ne’ebe fixu ba sira. 

“Atu konkorda ka lae, situasaun mak hanesan ne’e ona, Unidade Espesial Polisia infrenta situasaun sira hanesan ne’e, maibe nuudar komandante enkoraza nafatin membru sira atu hala’o kna’ar ho diak,” hateten Afonso iha nia servisu fatin kuarta (03/10). 

 Tuir nia hatene, prosesu konstrusaun edifisiu UEP nian foin maka atu hahu iha loron 10 Novembru tinan ne’e no UEP pronto tama maski sei iha prosesu konstrusaun. Kestaun ne’e mos, Sekretariu Estadu Defesa (SED) haruka ona karta ba Sekretariu Estadu Seguransa atu haruka membru PNTL husik fatin ne’ebe BOP sira okupa, atu bele kontinua konstrusaun ba sentru operasaun Militar, maibe lolos presiza uluk kondisaun diak ba membru BOP hafoin bele hasai husi fatin ne’eba.

.