“FM Konsidera Politika SES Fo Todan PNTL”

.

Jornal Timor Post - Tersa-feira, 09 Outubru 2012 

Fundasaun Mahein (FM) konsidera politika no manajementu iha Sekretariu Estadu Seguransa (SES) durante ne’e, fo todan ba komando Polisia Nasional Timor Leste (PNTL) iha area operasaun.

 “Hau la dehan failla, maibe falta kordenasaun, ezemplu sira hakarak desentraliza orsamentu PNTL, maibe akompaniamentu husi SES nia la dun la’o, impaktu ikus mak Polisia maka sala fali, haree lolos ida ne’e manajementu SES nia maka la’o la los,” dehan Diretur FM, Nelson Belo, ba Jornalista sira iha nia servisu fatin, Balide, Dili, foin lalais. 

 Nia mos hatutan, bainhira SES la fo kondisaun diak ba instituisaun PNTL, sei fo impaktu ba povu, tanba iha konflitu ruma mosu iha komunidade nia let, prezensia Polisia tarde, relasiona ho kondisaun polisia nia ne’ebe iha, la sufisiente. 

 “Ita la kria kondisaun diak ba PNTL ne’e implika ba sira nia saude, implika mos ba sira nia professional, tamba haree uma ne’ebe iha kintal ki’ik ne’ebe pronto tiha ona, maibe seidauk muda ba iha ne’eba, tenki husu ba SES atu esplika klaru,” tenik Diretur FM ne’e. 

 Kestaun Politika ne’e, SES maka tenki responsabliza, tamba komandu PNTL haree liu ba operasaun, la’os haree fali ba konstrusaun ka sosa fali ro no kilat. Iha parte seluk, Sekretariu Estadu Seguransa (SES), Francisco Guterres hateten, problema ne’ebe akontese durante ne’e, iha ona hanoin atu bele realiza, maibe seidauk bele determina lolos wainhira lolos atu bele rejolve, liu-liu kajerna PNTL nian hia Kintal Ki’ik ne’ebe to’o agora abandona hela.

.