“Deskonfia PNTL Proteje Jogu Ilegal”

.

Jornal Independente - Tersa-feira, 02 Outubru 2012 

Deputadu Parlamentu Nasional Eziji Ministru Comercio Industria no Ambiente (MCI) ho Polisia Nasional Timor Leste (PNTL) hodi apara jogu illegal.

 Entertantu membru deputadu iha parlamentu Nasional deskonfia jogu illegal kontinua mosu tamba pesoal PNTL mak fo protesaun. Deputadu Estanislau da Silva husi Bancada FRETILIN no deputadu Mateus De Jesus husi bancada CNRT dehan, tenki halo razia hodi taka jogu illegal hanesan SDSB, bola guling no jogu illegal sira seluk tanba, antes ne’e Primeiru Ministru Xanana Gusmao hatuun ona despaixo ida obrugatoriumente taka. 

 Deputadu Estanislau husi Bancada FRETILIN hatete, governu se de’it kuandu halo despaixo tenki kria kondisaun para kontrola atividade illegal sira ne’e. 

Jogu illegal ne’ebe kontinua lao iha rai laran, estanislau dehan, hatudu governu faille. Nia mos hatutan katak, jogu sira ne’ebe mak lao iha rai laran bele fo afeita ba ema nia moris liuliu familia sira ne’ebe ho rendimentu kiik. 

Nune’e mos, Deputadu husi Bancada CNRT, Mateus de Jesus hatete, inisiativa PM Xanana hasai despaixo ida taka jogu sira ne’e diak hodi evita violensia no bele fo impaktu ba familia uma laran. Deputadu Mateus dehan tan, jogu illegal ne’e kontinua akontese tanba deskonfia iha elementu PNTL no F-FDTL inklui lider balun mos partisipa jogu sira ne’e bainhira for a husi serviso. Tuir fontes ida ne’ebe la kohi publika nia identidade katak, PNTL fo fali protesaun ba jogu illegal hirak ne’e hodi hetan rendimentu. 

 Tuir nia, se karik la fo osan, pessoal PNTL husu tenki taka jogu ne’e. Entertantu, Diretor nasional ba Inspeksaun de Jogu Miguel Lobatu iha Ministeriu Comersiu Industria no Ambiente la kohi fo nia komentariu tanba halo inkontru.

.