“Lere Husu Sidadaun Hotu Hadomi Pas”

.

Jornal Independente - Kuarta-feira, 10 Outubru 2012 

Xefe Estadu Maior F-FDTL Major Jeneral Lere Anan Timor, fo hanoin ikas ba sidadaun hotu atu kaer metin unidade nasional hodi hadomi dame no pas hafoin Misaun Organizasaun Nasoens Unidas (ONU) remata, iha Dezembru oin mai. 

 Nia dehan, Timor Leste hetan nia independensia liu husi prosesu luta ne’ebe naruk no difisil tebes hodi sidadaun barak maka fakar sira nia raan no ruin lemo-lemo no ema ne’ebe hakarak kria instabilidade ne’e nia lakohi ukun an. 

 “Semak hakarak kria instabilidade ita konsidera hanesan ita nia inimigu, inimigu ba povu tomak, no ida ne’e inimigu ba nasaun nian,” dehan Maijen Lere iha Hotel Timor (09/10). 

Nia konfia katak, hafoin misaun ONU nian remata Timor bele la’o mesak no situasaun sei hakmatek nafatin. “Ita sei buka hadomi malu, ita sei mantein pas, estabilidade no progresu ba ita nia rain,” tenik Lere. Lere hatutan, kona-ba grupu balun ne’ebe tenta atu halo instablidade depois misaun ONU remata, parte instituisaun F-FDTL halo ona identifikasaun, kuandu asaun ne’e akontese, parte defeza no seguransa sei la tolera no la husik atu instabilidade kontinua mosu.

 Entertantu, husi parte PNTL nian mos alerta ona ba Povu Timor tomak atu mantein nafatin pas no estabilidade hafoin misaun ONU nia remata. Nune’e mos, Primeiru Ministru Xanana Gusmao promete ona iha Konselu Seguransa ONU katak, instituisaun defeza no seguransa Timor Leste Madura, professional no pronto ona atu kaer mesak seguransa iha rai laran, hafoin misaun ONU remata.

.