“Komisariu Longuinhos Komesa Hatudu Dez Respeitu Ba PN”

.

Jornal Timor Post - Kuarta-feira, 10 Outubru 2012

Komisaun B Parlamentu Nasional (PN) ne’ebe trata asuntu seguransa Defesa, konsedera komandante jeral Polisia Nasional Timor Leste (PNTL), Komisariu Longuinhos Monteiro komesa hatudu dezrespeita ba PN tanba dala rua ona komisaun B bolu maibe la marka prezensa. 

 “Ami husi komisaun B bolu Komisariu Longuinhos dala rua ona para mai, esplika kona ba prosesu promosaun no orsamentu retifikativu ne’ebe PNTL rasik husu maibe nia (Longuinhos) lamarka prejensa, ida ne’e bele hatudu dehan desrespeita ba instituisaun estadu direitu demokratiku ne’e,” dehan Prezidenti Komisaun B Lurdes Maria Bessa iha PN foin lalais ne’e. 

Lurdes informa katak, komisaun B rasik bolu dala rua ona komisariu PNTL atu bele informa situasaun iha instituisaun PNTL nia laran, maibe lahatene responde diak husi Longuinhos. 

Lurdes esplika, antes ne’e Komisaun B rasik bolu Prezidenti Komisaun Promosaun PNTL, Sekretariu Estadu Seguransa (SES), inklui mos komisariu PNTL Longuinhos, maibe husi arte Longuinhos hato’o fali karta ba Primeiru Ministru nuudar Ministru Defeza no Seguransa, katak, Komisariu PNTL lamarka prezensa iha PN, tanba nia parte la involve iha promosaun nia laran.

 Lurdes mos haktuir tan katak, Komisariu PNTL Longuinhos, lolos ne’e iha obrigasaun no dever atu bele ba Parlamentu nasional hodi esplika ba komisaun atu bele haree problema ne’ebe akontese iha instituisaun PNTL nia laran. 

 “Ami iha ne’e laos halo julgamentu, maibe ami maka aprova orsamentu, ami iha direitu atu bele hatene no hetan esplikasaun husi Komisariu PNTL no nia tenki mai hatan duni,” dehan Lurdes. 

.