Milisia Nia Oan Hetan Bolsu Estudu Husi Estadu

.

SUARA TIMOR LOROSAE - Kinta, 04 Outubru 2012 DILI 

 Komandante Besi Merah Putih (Milisia), FFDC nebe iha 1999 servisu hamutuk ho militar Indonesia, hodi apoia pro-integrasi, nia oan nain rua, hetan bolsu da estudu husi estadu Timor-Leste hodi ba eskola iha Malang-Indonesia. 

Arguido ho naran inisial, FFDC iha tinan 1999, asume kargu nudar Kepala Desa Suku Ulmera, Sub Distrito Bazartete, Distrito Liquiça, nebee hetan fiar husi estadu Indonesia hodi asume kargu hanesan, Komandante Besi Merah Putih, Suku Ulmera. 

 “Hau nia oan nain rua eskola iha Malang Indonesia, tamba hetan bolsu estudu husi estadu Timor-Leste. Fulan-fulan hau haruka deit osan han hemu, no osan kost nian, no osan eskola estadu mak selu. Kada tinan ida mak hau haruka tan osan transporte,”dehan arguido FFdC ba Tribunal, Kuarta (03/10), hodi responde perguntas Juiz Koletivo, nebe husu kona ba arguido nia oan nebee sei ativo iha eskola.

 Nia informa, iha 1999 mak nia servisu, maibe agora nia laiha servisu. Servisu nebee nia halo lor-loron mak toos no faan ai maran, hodi sustenta familia, nomos haruka ba nia oan sira iha Indonesia. 

 Iha Tribunal partisipante nebee asiste julgamentu senti triste rona deklarasaun husi arguido, tamba durante nee, Timor oan barak hakarak tebes atu hetan bolsu estudu, maibe persiza buat barak. Bolsu estudu nee fo fali ba ema milisia Besi Merah Putih nebee uluk lakohi independensia, sira nia oan hodi ba eskola. nes .

.