Okupantes Eis Hotel Resende: “Hatama Petisaun Ba Bancada FRETILIN”

.

Jornal Nacional Diario - Kinta-feira, 11 Outubru 2012

Komunidade ho estudante lubun boot ne’ebe okupa eis Hotel Resende entrega petisaun ba Bancada FRETILIN hodi bele hatutan ba meza Parlamentu nasional (PN) atu tau konsiderasaun ba sira nia problema. 

Liu husi sesaun Plenaria Parlamentu nasional, Kuarta (10/10), membru Bancada FRETILIN, Inacio Moreira, aprezenta petisaun okupantes eis Hotel Resende nia ne’e no intrega hikas ona ba Prezidenti PN, Vicente Guterres, atu bele konsidera ezijensia hirak ne’e.

 Iha Petisaun ne’e, okupantes eis Hotel Rezende, Dili, husu ba governu atu bele buka soluasaun adekuadu ba sira nia kondisaun antes muda sira husi fatin ne’eba.

 “Ho petisaun ne’e hau husu ba meja PN atu haree tok no hus ba governu bele tau matan rezolve ho didiak atu labele haterus malu,” hateten deputadu Inacio Moreira hodi foti as karta petisaun ne’e iha plenaria laran. Okupantes Hotel Rezende ne’e mos haktuir iha petisaun katak, pronto kolabora ho estadu atu sai husi eis Hotel Resende, maibe governu tenki kria kondisoens ho dignu ba sira, tanba sira la iha hela fatin no mahon ruma iha Dili laran atu buka moris no kontinua sira nia estudu iha Universitariu.

 Komunidade ho estudante lubun bo’ot ne’e, okupa Eis Hotel Resende hafoin krizi politika no military ne’ebe akontese iha tinan 2006-2007.

 Ba kestaun ne’e, membru PN husi Bancada CNRT, Antonio Ximenes mos foti lian iha plenaria hodi husu Deputadu Inacio Moreira konese ema hirak ne’e ka lae?

 “Ita labele uza Partidu Historiku FRETILIN atu subar ulun iha laran, ita iha lei para atu kumpri, se governu presiza atu hasai sira atu uza fatin ne’eba, ba estadu nia interese ita tenki sai duni,” Argumenta deputadu Antonio Ximenes.

 Deputadu Husi bancada CNRT nia argumenta ne’e, obriga Deputadu Inacio Moreira halo Pontu de Ordem, atu halo klarifikasaun lolos, maibe meza plenaria ne’ebe prezidi husi Presidenti PN, Vicente Guterres, la fo tempu.

 “Hau atu dehan deit, hau aprezenta petisaun ne’e, laos atu buak oin ka buka votus, maibe hanesan reprezetante povu nian, ne’ebe povu maka hili hodi mai tuur iha uma fukun PN atu koalia duni povu nia interese,” afirma Inacio.

,