“PM Ministu Selu Advogadu Hasoru Woodside Iha Tribunal”

.

Jornal Independente - Sesta-feira, 05 Outubru 2012 

Kompania Woodside Energy Ltd. Rezeita rejultaud audit husi ekipa governu Timor-Leste, ne’ebe identifika kompania husi Australia ne’e la selu taxa to’o billaun USD 3. 

Entertantu Primeiru Ministru Kay rala Xanana Gusmao selu (Kontrata) ona advogadu ida husi Nova Iorke atu defende direitu Povu Timor Leste nian iha Tribunal. 

 Portavos Kompania Woodside Energy Ltd, Daniel Clery hatete, Woodside selu tiha ona taxa kumpletu, maibe to’o ikus simu fali asesmentu taxa ida tan husi Governu Timor Leste. 

 Woodside la konkorda asesmentu taxa ne’e hodi lori governu koligasaun, ne’ebe lidera husi Primeiru Ministru xanana Gusmao ba Tribunal Distrital Dili hodi buka lia los, tuir prosedur ne’ebe estabelese ona. Maski nune’e, Portavos ne’e kontinua konsidera empreza Woodside nuudar parseiru ida entre Governu Timor Leste no Australia kona ba explorasaun mina no gas iha kampu Greater Sunrise (GS) iha Tasi Timor. 

 “Ami selu tiha ona asesementu taxa kompletu maibe, haruka fali asesementu taxa ida tan, tanba ami la konkorda iha parte balun no lei Timor Leste mos premiti ami hodi hato’o kestaun ne’e, tuir prosedementu ne’ebe estabelese tiha ona,” hateten Portavos Woodside ne’e, liu husi Email ba Jornal Independente, kinta (04/10). 

 “Ami konkorda iha oportunidade ba dezenvolvimentu ne’ebe fo satisfeitu ba aspirasaun husi parte hotu, xavi importante atu atinji asuntu ida ne’e maka regulamentu, nakloke no dialogu konstrutivu iha parte hotu. 

Ba kestaun ne’e, iha parte husi Governu, Primeiru Ministru xanana Gusmao sei dafenede dereitu povu nian iha Tribunal, relasiona ho kompania Woodside ho ConocoPhilips ne’ebe maka la selu taxa, liu lukru neebe mak sira hetan iha esplorasaun mina no gas tasi Timor. Kompania rrua ne’e, lori estadu Timor Leste ba Tribunal Distrital Dili, relasiona ho rejultadu audita husi ekipa Ministeriu Financas nian durante fulan 18 nia laran, ne’ebe hatudu Woodside no Conocophilips seidauk selu taxa. PM Xanana dehan, nia pronto atu ba hatan iha Tribunal, tanba kompania rua ne’e rezeita atu selu taxa no lori fali governu ba Tribunal. 

 “Hau mak sei ba responde iha Tribunal nuudar Xefe do Governu,” dehan xanana Gusmao liu husi konferensia da imprensa iha Airo Portu Dili hafoin fila husi Nova Iorke. Atu ba hatan iha Tribunal, Governu kontrata ona advogadu ida husi Amerika atu bele defende povu Timor Leste nia direitu. 

“HO ida ne’e maka governu kontrata, advogada ida husi EUA, mai defende ita, tanba ita nia kbiit kona ba buat sira ne’e seidauk diak, i advogadu ne’ebe ita fiar atu defende kazu ne’e,” tenik Xanana. 

Osan billaun U$ 3, PM Xanana dehan, osan ne’e osan estadu, tanba ne’e Timor oan hotu hamutuk atu defende.

.