“Samuel Marcal Reknese Portu Hera Failla Iha Kontratu”

.

Jornal Timor Post - Kuarta-feira, 03 Outubru 2012 

 Diretor Agencia Dezenvolvimentu Nasional (ADN), Samuel Marcal rekonese kontratu ne’ebe uluk Governu halo ho kompania Lifese Engineering faille tanba la mensiona aitem manutensaun no retensaun.

 “ADN harii, obra Portu naval lao hona, maibe depois hau haree kontratu ne’ebe uluk, ita nia governu halo ho kompania Lifese Engeeneiring, lamensiona aitem manutensaun no retensaun, ne’e maka prejudika, maibe agora dadaun ADN sei kontinua halo negosiasaun,” informa Samuel ba Jornalista iha Portu naval Hera (02/10), hafoin komisaun B halo fiskalizasaun ba Portu Naval Hera ne’ebe tohar. 

 Samuel konfesa tan katak, obra ba portu Naval ne’e la’o kleur ona hafoin maka ADN hatii, no problema ne’e loloos eis Ministru Infraestrutura no Sekretariu Estadu Obras Publiku maka iha responsablidade, tanba altura ne’eba halo kontratu la mensiona aitem hirak ne’e. Entaun ninia impaktu maka agora dadaun portu refere tohar, tanba laiha kualidade, no tenki hadia fila fali. 

Entertantu, hafoin halo fiskalizasaun no rona klarifikasaun husi diretor AND, Prezidenti Komisaun B Maria Lourdes deklara katak, konstrusaun Portu Naval Hera iha failansu boot tanba ne’e sira husi komisaun B sei tuur hamutuk hodi haree fali kestaun ne’e. 

Maria hatutan, husi fiskalizasaun ne’e, ita koalia klaru katak, Obra Portu naval Hera laiha duni kualidade hodi rejulta portu refere tohar, tan ne’e komisaun B sei hola desizaun ne’ebe diak ba estadu no ba instituisaun F-FDTL, li-liu komponente Naval.

.