“Veteranus Falsu Deklara An”

.

Jornal Independente - Kinta-feira, 04 Outubru 2012 

Situasaun ne’e akontese bainhira, komisaun omenazen liliu komisaun validasaun sira verifika dadus sira ne’ebe governu rekoilla inklui mos veteranu sira ne’ebe simu ona nia direitu. 

 Iha audensia entre komisaun F iha Parlamentu ne’ebe trata asuntu saude, edukasaun no antigo kombatente ho Ministeriu Solidaridade Sosial, Sekretariu asuntu veteranus informa katak, iha veteranus liu atus ida iha distritu manatuto entrega hikas nia medalla tanba deklara an laos veteranu ba libertasaun nasional. 

 Prezidenti Komisaun F deputadu Virgilio Hornay hatete, informasaun ne’ebe komisaun hetan katak, ema barak konsege fo fila medalla ne’ebe simu maibe osan la konsege tanba kuaze uza hotu ona. Virgilio hatutan, situasaun ne’e akontese tanba iha tempu rejistensia no verifikasaun, komisaun omenazen la fo atensaun seriu, nune’e, akontese ema ne’ebe lolos laos veteranus maka sai fali benefisariu.

 “Ne’e Erru boot ne’ebe governu halo, espera katak ba oin labele akontese, se la’e osan povu nian ba de’it ema balun,” hateten nia. Nia dehan, realidade hanesan ne’e, laos akontese deit iha Distritu manatutu maibe fatin seluk mos akontese barak, husu governu tenki tau atensaun ba kestaun ne’e. 

Ho situasaun ne’e, PN liliu komisaun kompotente aviza ba governu, liliu Ministeriu Solidaridade Social hodi verifika didiak lista veteranus ne’ebe mak iha, antes halo pagamentu.

.