“PN, LH Apoiu Governu Lori ConocoPhilips Ho Woodside Ba Tribunal”

.

Jornal Independente - Kinta-feira, 04 Outubru 2012 

Parlamentu Nasional no Organizasaun naun Govermental Luta Hamutuk fo apoiu ba Governu atu lori Kompania ConocoPhilips no woodside ba Tribunal Internasional, karik sira lakohi selu taxa. 

Diretur ONG Luta Hamutuk (LH) Mericio Akara husu ba Governu liu husi Ministru Enerjetika no Rekursu Naturais Alfredo Pires atu buka dalan hodi rejolve. 

 Entertantu, Vise Prezidenti parlamentu nasional Adriano do Nascimento husu ba Timor oan tomak atu fo apoiu ba Governu hodi audita klean, nia dehan karik kompania la selu duni taxa iha negosiasaun tuir mai tenki lori ba Tribunal.

 “Buat ne’e loos ka lae, tenki liu husi audit, sira selu ka la selu, osan ne’e biloens U$3 ka liu tan ou menus,” dehan Adriano. Vice Prezidenti Parlamentu Nasional ne’e eziji ba kompania rua ne’e tenki selu taxa tuir lukru ne’ebe maka sira hetan iha esplorasaun mina no gas iha tasi Timor. 

 “Se labele (la selu) lori ba tribunal para sira (kompania) selu, tanba sira hetan ona lukru husi esplorasaun ne’ebe sira halo iha tasi Timor,” dehan Vice Prezidenti PN Adriano iha PN (03/10). 

Adriano mos senti tristeza boot tanba kompania internasiaonal ho osan boot maibe la selu taxa ba lukru ne’ebe sira hetan nuudar povu maubere nia direitu, tamba kompania rua ne’e iha dever atu selu taxa ba nasaun no povu TL. 

 Iha parte seluk, ONG Luta Hamutuk husu ba Governu tenke halo negosiasaun diak ho empreza Woodside no ConocoPhilips hodi rezolve problema taxa. 

Diretur ONG Luta hamutuk, Mericio Akara dehan, karik informasaun neebe hasai husi Ministru Alfredo Pires ne’e loos, nia tenki bolu duni empreza rua ne’e hodi halo negosiasaun bazeia ba akordu, maibe, kuandu iha akordu ne’e hateten kada fulan tenke selu taxa mak empreza hirak ne’e la kumpri sira nia dever, tenki lori ba Tribunal hodi buka lia loos.

.