Alfredo Pires: “Laiha Fatin Atu Lori Ema Hotu Tama Negosiasaun GS”

.

Jornal Nacional Diario - Sesta-feira, 05 Outubru 2012 

Ministru Petroliu no Rekursu Naturais, Alfredo Pires hateten, laiha fatin atu ema hotu tama iha ekipa negosiasaun Greater Sunrise (GS) mai Timor Leste. 

 Alfredo Pires hato’o lia hirak ne’e, relasiona ho sosiedade sivil no politiku sira nia komentariu katak, atu garante negosiasaun Greater Sunrise no lori kadoras mai Timor Leste (TL) presiza envolve entidade hotu. 

 “Ita bele rona opiniaun hotu, maibe kona ba involvimentu husi parte sira ne’e senti difisil oituan, tanba se karik ita involve ema barak, aban bain rua mak negosiasaun lao la diak ema ida deit maka responsabliza, entaun se mak hakarak tama tenki pronto atu simu responsablidadetodan ne’e, mas ami simu ideas furak husi parte hotu hodi finaliza negosiasaun ne’e,” hateten Alfredo Pires ba JNDiario kinta (04/10), iha Aeroportu Internasional Nicolau Lobato Comoro Dili. Tuir Alfredo Pires katak, prosesu negosiasaun laos ita loke kios, ohin loke aban taka, ita tenki tuir regra negosia nian, forma ekipa negosiu nian ne’ebe involve teknik, politika. Komersial no juridisial, tanba ne’e responsablidade boot atu defende interese nasaun nian. 

 “Sira (Kompania Woodside) dala barak foti argumentu oioin atu halo konfuzaun boot ba Timor Leste, maibe hau dehan katak, lalika mai halimar ho Timor Leste, tanba Timor Leste nia ema matenek barak, uluk ami tama governu Greater sunrise iha perigu nia laran ona entaun ami halo estudu no halo investigasaun, ami hetan duni faktus katak, kompania Woodside hakarak hamonu Timor Leste,” esplika Alfredo Pires. 

Ministru ne’e mos fo ezemplu katak, sira dehan mai TL katak, tasi ne’e nia klean 300 mil metrus i halo kadoras labele liu, maibe bainhira halo estudu no investigasaun kadoras ne’e bele mai, sira uluk dehan, atu dada kadoras tenki sae foho iha tasi laran ho 45 graus ne’e susar, maibe governu halo estudu, dada kadoras ne’e 15 graus deit ne’ebe liu husi rai tetuk, iha buat barak mak sira subar no aumenta, maibe konsege detekta buat ne’e. 

Tantu kona ba zona esklusivu entre Australia no Timor Leste ba Greater Sunrise, Ministru Esplika, iha akordu ida ho Australia ba Zona esklusivu ne’ebe nia prazu atu remata iha Fevereiru 2013, maibe Governu monta ona politika ida atu re-negosiu fali, maibe estudu ba ida ne’e besik finaliza ona. Ba kestaun ne’e, antes ne’e mos, Diretur Ezekutivu Luta Hamutuk Mercio Akara hatete, Greater Sunrise atu mai Timor Leste presiza kontribuisaun entidade hotu nian, laos Gobernu gava-an lao mesak ba halo negosiasaun. 

.